Հասարակական կազմակերպությունների մասին նոր օրենքը ավելի բարենպաստ միջավայր կստեղծի կազմակերպությունների համար, կընդլայնի դրանց աշխատանքը և կնպաստի ժողովրդավարության զարգացմանը Հայաստանում։ Այս մասին մեզ հետ զրույցում նշեց «Աջակցություն Հայաստանում ժողովրդավարական կառավարմանը» (ԱՀԺԿ) ծրագրի թիմի ղեկավար Ջոն Ռայթը։
Հարցին, թե ինչո՞ւ անհրաժեշտություն առաջացավ հասարակական կազմակերպությունների մասին նոր նախագիծ մշակելու, արդյո՞ք Հայաստանում այս մասով մեծ բաց կար, Ռայթը պատասխանեց. «Սկզբունքորեն այս ամենն ունի երկար պատմություն։ Օրենքը գոյություն ուներ 8 տարի, այդուհանդերձ, կառավարությունը նախաձեռնեց նոր օրինագծի մշակումը, որը բավական մեծ տարակարծություններ առաջացրեց, որովհետև շատ հակասական էր ՀԿ-ների կարծիքը, ուստի օրինագծի հետագա ընթացքը կասեցվեց։ Այդուհանդերձ, այդ ժամանակվանից, այսինքն` վերջին 7 տարիների ընթացքում, ՀԿ-ները սկսեցին աշխատել իրենց առանձին նախաձեռնություններն առաջ տանելու նպատակով նոր նախագիծ ստեղծելու ուղղությամբ։ Մոտավորապես 1,5 տարի առաջ ընդհանուր դրույթների շուրջ ձեռք բերվեց համաձայնություն, որը վերջերս վերածվեց նախագծի»։
Ինչ վերաբերում է նրան, թե Հայաստանի անդամակցությունը ԵՏՄ-ին որքանո՞վ կարող է խանգարել կամ խոչընդոտել երկրի ժողովրդավարացմանը, հաշվի առնելով նաև Ռուսաստանի կողմից գործադրվող ճնշումները, Ջոն Ռայթն արձագանքեց. «ԵՏՄ-ն Հայաստանի ընտրությունն է, և պարտադիր չէ, որ այդ ընտրությունը որևէ կերպ խոչընդոտի ժողովրդավարացման գործընթացին»։
Հարցին, թե հնարավոր համարո՞ւմ է, որ Ռիգայի գագաթաժողովում Հայաստան-ԵՄ հարաբերություններում հստակեցում մտցվի, և որևէ փաստաթուղթ ստորագրվի, նա կարճ պատասխան տվեց. «Հուսով ենք»։
