Թուրքիայի Թմրամիջոցների դեմ պայքարի բաժինը անցկացրել է հերոինի առգրավման խոշոր օպերացիա: Թմրանյութը Թուրքիայի տարածքով ուղարկվում էր Եվրոպա՝ հայտնում է ITAR-TASS-ը:
Ինչպես հաղորդում է տեղի մամուլը, օպերացիայի նախապատրաստությունը տևել է շուրջ կես տարի ու վերջապես արդյունք է տվել:
201 կգ հերոինը առգրավվել է երկրի հարավ-արևելքի Գազիանտեպ նահանգից: Թմրանյութերի առևտրով զբաղվողները դիմել են խորամանկության՝ ճանապարհ ուղարկելով երկու բեռնատար: Նրանց կարծիքով՝ ոստիկանությունը ժամանակ ու ցանկություն չի ունենա՝ ստուգելու երկրորդ բեռնատարը:
Թմրանյութերով փաթեթները թաքցրել էին մանկական թխվածքաբլիթի ու չրերի տուփերում: Բեռների վերջնակետը եղել է Նիդերլանդները:
Թմրանյութի մի խմբաքանակն էլ ոստիկանությունը առգրավել է Կիրկլարելի նահանգից՝ Թուրքիայի եվրոպական մասից: Այստեղ դիմել են ավանդական խորամանկության ու Իրանից ստացված 34 կգ հերոինը թաքցրել են ավտոմեքենայի բենզաբաքի մեջ: Հերոինը ուղարկվում էր Բուլղարիա:
