Վատիկանում Հռոմի պապ Բենեդիկտոս 16-րդի՝ գահից հրաժարումը նշանավորվել է միստիկական բնական երևույթով: Տեղացիները հաստատել էն, որ փետրվարի 11-ին՝ Հռոմի պապի հայտարարությունից հետո, քաղաքում կայծակ է եղել ու այն հարվածել է Սուրբ Պետրոսի տաճարին,- գրում է «Գոլոս Ռոսիին»:
Հավատացյալների մի մասը կայծակի մեջ նշմարել է Աստծո նշանը: Նորությունն այն մասին, որ Բենեդիկտոս 16-րդը պատրաստվում է թողնել Սուրբ գահը, դժգոհությունների ալիք է բարձրացրել կաթոլիկների շրջանում:
Որոշ կաթոլիկներ ենթադրում են, որ գահից հրաժարումը կդառնա Կաթոլիկ եկեղեցում տարաձայնությունների պատճառ, ինչպես դա եղել է Գրիգոր 12-րդի հրաժարականից հետո: Մյուսները հավատում են 12-րդ դարի իռլանդացի եպիսկոպոս սուրբ Մալախիի գուշակությանը, համաձայն որի՝ Բենեդիկտոս 16-րդի իրավահաջորդը կդառնա պատմության մեջ վերջին Հռոմի պապը:
Պապը պաշտոնապես գահից կհրաժարվի փետրվարի 28-ին՝ տեղի ժամանակով ժ. 20:00-ին:
