Ամերիկացի հետազոտողները կատարել են հանրահայտ վարպետ Պաբլո Պիկասոյի մի քանի կտավների քիմիական հետազոտություն ու պարզել, որ նա նկարել է նաև նրանով, ինչով ներկում էին ցանկապատներն ու տանիքները,- հայտնում է New Scientist-ը:
Չիկագոյի Արվեստների ինստիտուտի և Արգոնի ազգային լաբորատորիայի գիտնականները եզրակացրել են, որ Պիկասոն առաջին նկարիչներից է եղել, ով յուղաներկից անցել է էմալայինի: Վերջինը, որպես կանոն, օգտագործվել է տնտեսական աշխատանքների համար: Այն ունեցել է մի շոշափելի առավելություն՝ բավական արագ է չորացել: Ռենտգենյան ուսումնասիրության միջոցով հետազոտողները պարզել են, որ Պիկասոյի մի նկարի ներկում ցինկի և երկաթի օքսիդի քանակությունը համապատասխանում է տվյալ միացությունների չափին Ripolin ընկերության ներկում:
Ենթադրվում է, որ, Պիկասոյից բացի, Ripolin-ի արտադրանքից օգտվել է նաև Լե Կորբյուզյեն: Գիտնականները վստահ են, որ շուտով այս ենթադրությունը ևս կհաստատվի:
Թե որ նկարներն է Պիկասոն նկարել տնտեսական ներկով՝ հետազոտողները չեն ճշգրտում: Որոոշ ԶԼՄ-ների տվյալներով՝ խոսքը 1931-ին ստեղծված «Կարմիր բազկաթոռ»-ի մասին է:
