ՀԱԿ-ի շուրջ մաքոքային զարգացումները շարունակվում են: Ինչպես տեղեկացնում են «Հրապարակի» աղբյուրները՝ Տեր-Պետրոսյանի կուսակցություն ստեղծելու հանկարծահաս արագությունը պայմանավորված էր նույն ՀԱԿ-ը փրկելու մտահոգությամբ, որովհետև վերջինս հասկանում էր, որ ընտրություններից հետո ՀԱԿ-ից ոչինչ չի մնա: Մյուս կողմից էլ, Տեր-Պետրոսյանը դրանով ՀԱԿ-ում նոր «իշխանության» ձևավորման գործընթացը կանխեց:
Եվ, այնուհանդերձ, ՀԱԿ-ը կուսակցություն դարձնելու գործընթացը հարթ չի ընթանում: Նախ, իրավական խնդիրներ կան. նախաձեռնողների այն խումբը, որը դիմել է արդարադատության նախարարություն՝ նոր կուսակցություն գրանցելու համար, խոցելի է, որովհետև ստորագրածների թվում այլ կուսակցության, կոնկրետ դեպքում ՀՀՇ-ի ներկայացուցիչներ կան՝ Լևոն Տեր-Պետրոսյան, ՀՀՇ փոխնախագահ Սամվել Աբրահամյան, Աշոտ Սարգսյան, ինչը հակասում է «Կուսակցությունների մասին» ՀՀ օրենքի դրույթներին: Ըստ նույն աղբյուրների՝ կուսակցություն մտնել ցանկացողների մի մասն էլ Հայաստանում չէ, խոսքը «Հայոց հայրենիք» կուսակցության մասին է, որի ղեկավար պարոն Բակլաչյանը Կրասնոդարում զբաղված է բիզնեսով:
Խնդիրներ կան նաև կուսակցության ղեկավարի հարցում, ճիշտ է, նոր ՀԱԿ-ը ձևավորվում է Լևոն Զուրաբյանի «հագով», և արդարադատության նախարարությանը դիմած խումբը «ղեկավարում» է նա, այնուհանդերձ, Տեր-Պետրոսյանի մերձավորները հույսները չեն կորցնում, որ ոչ թե Զուրաբյանը, այլ Տեր-Պետրոսյանի քարտուղար Ավետիս Ավագյանը կղեկավարի կուսակցությունը:
