Վրաստանի նախագահ Միխեիլ Սաակաշվիլին քաղաքական բոլոր ուժերին կոչ է արել «ընդհանուր լեզու գտնել» և ԵՄ-ին մերձենալու պատմական հնարավորությունը չկորցնել:
Այդ մասին Վրաստանի նախագահը հայտարարել է ԵՄ ընդլայնման և հարևանության հարցերով եվրահանձնակատար Շտեֆան Ֆյուլեի հետ ունեցած համատեղ մամուլի ասուլիսում:
«Մենք ունենք հնարավորություն, դեռևս ունենք հնարավորություն Վիլնյուսյան գագաթաժողովում ԵՄ-ին անդամակցելու հեռանկար ստանալ և դրա համար մեզ ներքին խաղաղություն է հարկավոր: Մենք այդ հեռանկարի համար չպետք է տարիներ կորցնենք: Եթե մենք չհասցնենք այդ գնացքը նստել, ապա ԵՄ-ին անդամագրվելու հեռանկարը մի քանի տարով հետ կնահանջի»,- ընդգծել է նախագահը:
Սաակաշվիլին նշել է, որ դրա համար է իր թիմը և ինքն անձամբ խորհրդարանին կոչ անում ընդունել սահմանադրական փոփոխությունները, որտեղ կամրագրվի, որ Վրաստանը կդառնա միայն ԵՄ անդամ, այլ ոչ մեկ ուրիշ քաղաքական միավորման:
Նա նաև նշել է, որ նման դրույթներ կան Խորվաթիայի, Լիտվայի և այլ երկրների սահմանադրություններում, և որ դա ընդունելի է նաև իրենց համար:
Սաակաշվիլին ընդգծել է, որ մինչ Վիլնյուսյան գագաթաժողովը, հարկավոր է հասնել համաձայնեցված գործողությունների: «Այդ նպատակով ես պատրաստ եմ հաճախակի հանդիպել վարչապետի հետ և մեր խնդիրները բանակցային սեղանի շուրջ լուծել: Մեզ պատմական հնարավորություն է ընձեռվել, և մենք միասին այն պետք է օգտագործենք: Ժամանակն է վերջ տալ «փչացած հեռախոսին» և անձամբ կապ հաստատել վարչապետի հետ»,- ասել է նախագահը:
