ՀՀ նախագահի ՀՀԿ թեկնածու Սերժ Սարգսյանի քարոզարշավին մասնակցում են հայ շոու-բիզնեսի ամենաշատ աստղերը: Երգչուհի Աիդա Սարգսյանը ոչ միայն երգում է քարոզարշավի ընթացքում, այլև երեկ եկել էր մասնակցելու Էրեբունի համայնքում Սերժ Սարգսյանի նախընտրական հանդիպմանը: Առիթից օգտվելով՝ «Առաջին լրատվական»-ը մի քանի հարց ուղղեց նրան:
– Տիկին Սարգսյան, Դուք հարցեր ունե՞ք Սերժ Սարգսյանին, որ եկել եք:
– Եկել եմ լսելու:
– Հնարավո՞ր է՝ ուզում եք ուղղակի տեսնեն, որ ոչ միայն երգիչ եք, այլև ընտրող:
– Զուտ տեսնելու համար երբեք ոչ մի տեղ չեմ գնում և չեմ հայտնվում: Ես կարող եմ ընդհանրապես անցնել ընդհատակ, բայց ինքս իմ գործերն առանց գովազդելու կատարեմ: Երբևիցե չեմ անի ինչ-որ բան, որ ես ինձ ցույց տամ:
– Արդեն որոշե՞լ եք՝ ում եք ընտրելու:
– Ես արդեն մասնակցում եմ քարոզարշավին:
– Իսկ այստեղ երգելո՞ւ եք, թե՞ ոչ:
– Այսօր՝ ոչ երևի:
– Կարելի՞ է իմանալ՝ որքան եք վարձատրվում նախընտրական քարոզարշավին մասնակցելու համար:
– Դեռ կոնկրետ չգիտեմ: Մենք ուղղակի երգում ենք առայժմ:
– Ասել է թե՝ գնում եք գյուղերով, աշխատում եք ու դեռ պայմանները չգիտե՞ք՝ որքան եք վարձատրվելու:
– Մենք էդ թեմայով չենք խոսում ընդհանրապես:
– Ձեզ ասում են՝ նախագահի համար է, պարտավոր եք երգե՞լ:
– Չէ, չէ, երբևիցե նման պարտադրողաբար ոչինչ չի եղել, և անկախ ամեն ինչից, եթե եղել են թեկուզ միջոցառումներ, թեկուզ պետական, մենք բոլորս էլ վարձատրվել ենք: Էնպես չի եղել, որ շահագործեն ինչ-որ մեկի անձը:
– Բավարարվա՞ծ եք եղել այդ վարձատրությունից:
– Այո, իհարկե, միանշանակ:
– Իսկ Ձեր հետագա կարիերայի վրա ինչպե՞ս է դա անդրադարձել՝ դրակա՞ն է եղել նախընտրական քարոզարշավներին մասնակցության անդրադարձը:
– Ես ինքս անհատ մարդ եմ, երգչուհի եմ և չեմ գնում ինչ-որ մի բանի, որ հետո դրանից ես արդյունք ստանամ, որովհետև ես ժողովրդի համար եմ երգում:
– Եթե ժողովրդի համար եք երգում, այդ դեպքում ինչո՞ւ մյուս թեկնածուների քարոզարշավներում էլ չեք երգում:
– Իրենք չեն առաջարկել:
– Փաստորեն, էստեղ էլ չգիտեք՝ Ձեզ վարձատրելո՞ւ են, թե՞ ոչ, բայց երգում եք:
– Դե, դա ուրիշ, ներքին, չգիտեմ… ամեն մեկս մեր ձևի հարգելով, վերջիվերջո՝ ես ասեմ, ես դուրս եմ գալիս ժողովրդի առաջ հանդես գալու, ներկայանալու:
– Որքան գիտենք՝ Ձեր ամուսինը վարչապետի թիկնապահներից է, կարելի՞ է իմանալ՝ իր կարիերայի վրա ինչպե՞ս է անդրադառնում նախընտրական քարոզարշավներին Ձեր մասնակցությունը:
– Ոնց որ միշտ եղել է. ամեն մեկս՝ մեր գործով:
– Չե՞ք կարծում, որ նախընտրական քարոզարշավներին մասնակցելը քաղաքականացնում է երգչուհիներին, նրանց պալատական երգչուհու երանգ է տալիս: Մտավախությո՞ւն չունեք, որ ժողովուրդը Ձեզ կընկալի իբրև պալատական երգչուհի:
– Մինչ օրս նման բան չի արձանագրվել, որովհետև ես երգել եմ բոլորի համար, երգում եմ բոլորի համար: Կոնկրետ ուղղվածություն երբևէ չեմ ունեցել: Էնպես որ, ոչ ոք ինձանից ոչ նեղացել ա, ոչ էլ ես եմ նեղացել:
– Եթե անգամ նման ջանասիրությամբ շարունակեք նախընտրական արշավներին մասնակցել, կարծում եք՝ Ձեզ չե՞ն ընկալի որպես պալատական երգչուհի:
– Ես ամեն անգամ չէ, որ կարողանում եմ մասնակցել, որովհետև այդքան պարապ չեմ, որովհետև մենք էլ մեր անձնական գործերն ունենք: Ես նաև մեկնում եմ հյուրախաղերի՝ իմ անհատական երգարվեստով ներկայանալու: Էնպես որ, պարապ տանը նստած չեմ, որ ամեն անգամ կարողանամ իմ մասնակցությունը ցուցաբերել:
– Իսկ կարելի՞ է իմանալ՝ Ձեր հովանավորներն իշխանակա՞ն դաշտից են:
– Ես չունեմ հովանավոր:
