Արարատի մարզում ջերմոցային տնտեսություն ունեցողները արդեն ջերմոց ունենալը ռիսկային են համարում: Այս մասին «Առաջին լրատվական»-ի հետ զրույցում ասացին Արարատի մարզի Բուրաստան գյուղի բնակիչները:
Նրանց պնդմամբ՝ ջերմոցային տնտեսությամբ նախկինում կարողանում էին գոնե իրենց տանջանքի դիմաց եկամուտ ստանալ, իսկ հիմա՝ ոչ։ «Գյուղացին իր ապրանքը էժան է տալիս, չի արդարացնում ջերմոցն իրեն։ Մինչև մեր ջերմոցներում ապրանքը դուրս է գալիս, շուկան լցնում են ներկրված ապրանքով, և ապրանքի գինն իջնում է, ստիպված գյուղացին իր նոր ստացած բերքը պետք է էժանացնի։ Ներկրում են և 1000 դրամով, օրինակ, այս սեզոնին լոլիկ վաճառում։ Գյուղացուն ձեռնտու չէ այդ գինը, այն գնալով իջնում է, և արդյունքում մենակ ցելոֆանի ու դեղերի փող է դուրս գալիս, եկամուտ չկա»,- պնդեցին գյուղատնտեսները:
Նրանց կարծիքով՝ պետք է կառավարությունը համապատասխան քայլեր կատարի, որպեսզի գյուղմթերքի ներկրման ծավալները կրճատվեն, քանի որ եթե գյուղացուն թողեն իր բերքը իրացնել սեզոնային գներին համապատասխան, հողի հետ կռիվ տվողը չի հիասթափվի ու կշարունակի արտադրանք ապահովել։ «Մեր բերքը չի իրացվում, ասում են՝ օգնում են, բայց հեքիաթներ են պատմում. երբ են օգնում, երբ 40 դրամով մթերում են»,- ասացին գյուղացիները:
Նրանք կառավարությանը հորդորեցին իսկապես թեքվել դեպի գյուղը, եթե չեն օգնում, գոնե չխանգարեն:
Գյուղացիական ջերմոցային տնտեսությանը խանգարում են հենց ղեկավարները, ջերմոցային համալիրների օլիգարխները, քանի որ շուկայում առաջինն իրացվում է իրենց արտադրանքը՝ թանկ գներով:
Մանրամասները՝ տեսանյութում։
