Հարավային Ամերիկայի և Աֆրիկայի երկրները 2010 թ. ամենաշատն են ավելացրել իրենց ռազմական ծախսերը: Այս մասին ասվում է Խաղաղության խնդիրների ուսումնասիրության Ստոկհոլմի ինստիտուտի հաշվետվությունում: Հարավային Ամերիկայի երկրները միջինում իրենց ռազմական ծախսերը ավելացրել են 5.8%-ով, Աֆրիկայի երկրները՝ 5.2%-ով: Ռազմական ծախսերի 2.5% և 1.4% աճ է արձանագրվել Մերձավոր Արևելքի և Ասիայի երկրներում: Իսկ Եվրոպայի երկրները նվազեցրել են իրենց ռազմական ծախսերը 2.8%-ով:
Ընդհանուր առմամբ, 2010 թ. աշխարհում ռազմական ծախսերը կազմել են 1.63 տրլն դոլար, որը 2009 թ. համապատասխան ցուցանիշի համեմատ աճել է 20.6 մլրդ դոլարով կամ 1.3%-ով: ԱՄՆ ռազմական ծախսերը 2010 թ. (2009 թ. համեմատ) աճել են 19.6 մլրդ դոլարով կամ 2.8%-ով: Առանց ԱՄՆ-ի ռազմական ծախսերի այս աճի՝ աշխարհի ռազմական ծախսերը միջինում կաճեին 1%-ով:
Բացարձակ թվով, աշխարհում ամենաշատ ռազմական ծախսերը բաժին են ընկնում ԱՄՆ-ին՝ 698 մլրդ դոլար, Չինաստանին՝ 119 մլրդ դոլար, Մեծ Բրիտանիային՝ 59.6 մլրդ դոլար, Ֆրանսիային՝ 59.3 մլրդ դոլար, և Ռուսաստանին՝ 58.7 մլրդ դոլար: Այսինքն՝ ԱՄՆ ռազմական ծախսերը գերազանցում են երկրորդ տեղում գտնվող Չինաստանի ռազմական ծախսերը մոտ 6 անգամ և Ռուսաստանի ռազմական ծախսերը՝ մոտ 12 անգամ: Չինաստանը 2009 թ. համեմատ ավելացրել է իր ռազմական ծախսերը 3.8%-ով, իսկ Մեծ Բրիտանիան, Ֆրանսիան և Ռուսաստանը նվազեցրել են իրենց ռազմական ծախսերը համապատասխանաբար 0.8, 8.4, և 1.4 տոկոսով: