Քիչ առաջ «Առաջին լրատվական»-ը տեղեկացրել էր, որ նախագահի թեկնածու Պարույր Հայրիկյանի մահափորձի գործով կա նաև երրորդ ձերբակալվածը՝ էպոսագետ Վարդան Սեդրակյանի աներն է: Yerkir.am-ին տված պարզաբանման մեջ Վարդան Սեդրակյանը հերքել էր այդ տեղեկատվությունը: Քիչ առաջ ստացանք լուրի հավաստումն առ այն, որ այս գործով ձերբակալված և երկու անձանցից բացի կա երրորդ անձ և որը Վարդան Սեդրակյանի ազգականն է: «Առաջին լրտավական»-ին դեռ չի հաջողվել պարզել այդ երրորդ կասկածյալն բարեկամական ինչ հարաբերություններ ունի էպոսագետի հետ, բայց որ նա կա և էպոսագետի հետ փոխկապակցված անձ է, հաստատում են մեր աղբյուրները:
Հետաքրքրական է, որ Վ.Սեդրակյանը՝ իմանալով, որ այդ գործով կա երրորդ ձերբակալված անձ, և որ նշյալ անձն իր հետ կապված է բարեկամական կապով այդ մասին ոչինչ չի ասում:
Հիշեցնենք, որ նախորդ երկու ձերբակալվածները՝ Սամվել Հարությունյանը և Խաչատուր Պողոսյանն էլ էպոսագետի տան աշխատողներն են եղել: Առաջինը՝ իր խոսքերով «կաֆել խփող» է եղել, իսկ երկրորդը՝ վարորդ:
Ինքը՝ էպոսագետը թեև հաստատում է, որ վերը նշված մարդիկ իր հետ կապ ունեն, բայց միաժամանակ չի էլ հերքում, որ ինքը կարող է այդ մահափորձի հետ կապ ունենալ: Երեկվա մեր հրապարակումից հետո նա տարբեր լրատվամիջոցներում հարցազրույցներ է տվել և հայտարարել, որ ընտրություններից հետո՝ փետրվարի 22-25-ը իրեն կձերբակալեն: Նա նաև բացատրել է, թե ինչու է իր «Volvo» մակնիշի մեքենան տվել ձերբակալվածներից Ս.Հարությունյանին, իսկ Խ.Պողոսյանին՝ 6000 դոլար: «Այդ երկու ձերբակալվածներից մեկի տունը մեր տան դիմացն է, ինքը արհեստավոր մարդ է, ինձանից 4-5 տարի փոքր: Իսկ մյուսի հետ, որ թմրանյութերի վաճառքով է զբաղվում, ծանոթացել էի անցած տարի: Եղվարդում ունեմ առանձնատուն, և Սամվելը, ավարտելով վերանորոգումը, գնաց Եղվարդ: Նա տաքսիստի գտավ, և տաքսիստը՝ Խաչատուրը, նրանց տանում-բերում էր: Որոշ ժամանակ անց մեքենան վթարի ենթարկվեց: Ես վաճառել եմ հին ավտոմեքենան՝ «Վոլվո»-ն և քանի որ գումար չունեին, պետք է այդ 6 հազար դոլարը վերադարձնեին՝ ամսական 500 դոլար: Երեք ամիսներինը արդեն տվել են: Այսօր կարդում եմ, որ ահաբեկիչներին մեքենա եմ տվել»,- ասել է էպոսագետը:
Ընդ որում նա իր այս խոսքում ասում է, որ մեքենան վաճառել և գումարն է նրանց պարտքով տվել: Իսկ երեկ նա մեզ հետ հեռախոսազրույցում հաստատեց, որ թե մեքենան է տվել, թե՝ 6000 դոլարը: Վաճառելու մասին որևէ բան չասեց: Նա նաև ակնարկելով մեզ՝ ասում է, որ նույն լրատվամիջոցն է շրջանառության մեջ դրել հոկտեմբերի 27-ի գործով Նաիրի Հունանյանի հետ իր հնարավոր կապի կամ Տիգրան Նաղդալյանի սպանության գործով հարցաքննության մասին լուրերը: Նրա ասածը մասամբ է ճիշտ: «Առաջին լրատվական»-ը Վ.Սեդրակյանի հետ առանձին հարցազրույցում անդրադարձել է այդ երկու թեմաներին: Բայց Ն.Հունանյանի հետ կապ ունենալու մասին խոսակցությունները պարզապես հիշեցրել է: Իսկ Տ.Նաղդալյանի գործով հարցաքննությունն ինքն անձամբ է ասել, երբ հոկտեմբերի 27-ի հետ կապված նրան հարց է տրվել:
Լրատվամիջոցներն այդ հարցը սկսել են իրեն տալ իր իսկ բացահայտումից հետո: «Հոկտեմբերի 27-ով ես չեմ հարցաքննվել: Բայց դրանից ամիսներ առաջ ես Վազգեն Սարգսյանին ասել եմ, որ իր քայլերի վերջնական արդյունքը կլինի այն, որ իրեն ֆիզիկապես ոչնչացնելու են: Իրականում հարցաքննվել եմ Տիգրան Նաղդալյանի սպանության հետ կապված: Սպանությունը եղավ 2002-ի դեկտեմբերին: Ես մի տեղ ասել էի, որ դեկտեմբերին նրա գլուխը կջարդեն: Այդ խոսքը տեղ է հասել, մտածել են, թե գուցե ինչ-որ կապեր կան: Բայց հետո ուսումնասիրում և տեսնում են, որ այս մարդը կապ չունի, ընդամենը ինչ-որ բան է ասել, որն իրականացել է»,- դեկտեմբերի 25-ին մեզ հետ ունեցած հարցազրույցում ասել էր նա:
Այնպես որ էպոսագետը չգիտես ինչու՝ խճճում և խեղաթյուրում է հրապարակումներն ու դրանց ժամանակագրությունը: Իդեպ Վ.Սեդրակյանն արդեն ակնհայտ նյարդայնացած է թվում ու սկսել է ինչ-որ բացահայտումներ անել իր և ձերբակալվածների կապի մասին: Ասում է. «Ս.Հարությունյանի ավագ եղբայրը՝ Ռոբերտ Հարությունյանը բանտում է արդեն երկու տարի է, մեղադրվում է հարուստ մարդու տուն զինված հարձակման համար: Միգուցե դա՞ էլ եմ ես սովորեցրել: Պարբերաբար ինքը փող է խնդրել, մեծ գումարներ, քննիչների հետ հարցերը լուծելու համար: Այդ մասին չի ասում ոչ մի տեղ»:
Նա նաև հետագա գործողություններն էլ է կանխատեսում, թե շուտով մամուլում ձայնագրություն կհայտնվի, որ ինքն այդ ձերբակալվածներին ինչպես է գումար տալիս: Ընդ որում այդ մասին դեռ հրապարակում չի եղել, բայց Վ.Սեդրակյանը հավանաբար լավ է հիշում իր և կասկածյալների մեջ եղած կապն ու շփումները: Իհարկե, որևէ մեկը նրա մասին այնքան մեծ կարծիք չունի, որ ասի, թե հոկտեմբերի 27-ի ոճրագործություն ինքն է կազմակերպել կամ իր ձեռքի գործն է: Եվ Տ.Նաղդալյանի սպանությունն էլ իր պատվերն էր: Բայց հավանաբար հետաքրքիր կլիներ լսել, թե իր, «կաֆելշիկի ու նարկաման տաքսիստի» հետ ինչ կապ ունի ձերբակալված երրորդ կասկածյալը:
Լուսանկարը՝ PanARMENIAN Photo-ի
