Բրիտանական խոշորագույն BBC հեռուստառադիոկորպորացիայի աշխատակիցները գործադուլ կանցկացնեն՝ ի նշան բողոքի աշխատատեղերի նախատեսված կրճատումների դեմ- հաղորդում է Reuters-ը:
Լրագրողների ազգային միության ղեկավարությունը, որը ներկայացնում է նաև BBC-ի աշխատակիցների շահերը, հայտարարել է, որ գործադուլը նշանակված է փետրվարի 18-ին: Ակցիան կազմակերպվել է՝ ի նշան բողոքի կորպորացիայի ղեկավարության ծրագրի դեմ, որի համաձայն՝ մոտակա հինգ տարիների ընթացքում նախատեսվում է կրճատել 2000 աշխատատեղ:
«BBC-ն պատրաստվում է հասարակական գումարները ծախսել աշխատատեղերի կրճատման համար, փոխարենը նոր աշխատանքի անցնելու պայմաններ ստեղծել աշխատակիցների համար, որոնք հայտնվել են աշխատանքից հեռացման վտանգի առջև»,- հայտարարել է Լրագրողների ազգային միության գլխավոր քարտուղար Միշել Սթենիսթրիթը:
Իր հերթին, BBC-ի ղեկավարությունը հայտարարել է, որ հիասթափված է նախատեսվող գործադուլի մասին հաղորդագրություններից և մտադիր է մոտ ժամանակներս բանակցել արհմիության ներկայացուցիչների հետ ու փորձել ելք գտնել ստեղծված իրավիճակից:
Վերջին մի քանի տարիներին BBC-ն ծախսերը կրճատելու նպատակով ստիպված է եղել կրճատել աշխատակիցներին: 2005 թ. կորպորացիան կրճատել է ավելի քան 3700 աշխատակցի, իսկ 2007 թ.՝ շուրջ 2800:
