Հռոմի Պապ Բենեդիկտոս XVI-ի հրաժարականը Սուրբ Պետրոսի գահից «պայթեցրեց» Twitter-ը: Այդ մասին այսօր նա հայտնել էր կարդինալների հետ հանդիպման ժամանակ: Լուրն անմիջապես տարածվեց ողջ աշխարհով: Աշխարհի տարբեր ժողովուրդներ, տարբեր լեզուներով մեկնաբանել են Պապի հրաժարականը:
«Ժամանակակից քայլ՝ ավանդապաշտ Պապից», «Օրինակ, որին պետք է հետևել», «Պատասխանատու գործողություն», «Եկեղեցին փոխելու ազատ կամարտահայտություն». այսպես է արձագանքել Վատիկանի նորությանը ինտերնետ-հանրությունը:
Պապի որոշումը հավանության են արժանացրել նաև քաղաքական աշխարհում: «Ես խորապես հարգում եմ Բենեդիկտոս XVI-ի որոշումը, վստահ եմ, որ այն ուղղված է եկեղեցու բարօրությանը»,- ասել է Իտալիայի վարչապետ Մարիո Մոնտին: Իր հերթին, Իտալիայի նախկին վարչապետ Սիլվիո Բեռլուսկոնին հայտարարել է, որ խորապես հիացած է հովվապետի քայլով, որն այդքան պատասխանատու և ազնիվ է: Եկեղեցական հերարխիաները հրաժարականն անվանել է «համարձակ քայլ»:
Բացասական արձագանք եղել է Լեհաստանից, որտեղ տեղի հոգևորականները, հիշելով Հովհաննես Պողոս Երկրորդի կառավարման վերջին 6 տարիները, երբ նա հիվանդ էր, ասել են. «Խաչից չեն հրաժարվում»:
Վատիկանի մամլո ծառայությունը հերքել է Պապի հիվանդության մասին լուրերը, ով իր հրաժարականը մեկնաբանել է իր տարիքով և հոգնածությամբ: Ապրիլին նա կդառնա 86 տարեկան:
Բենեդիկտոսը Twitter-յան իր վերջին գրառումն արել է փետրվարի 10-ին. «Մենք պետք է ապավինենք Աստծո ողորմածությանը: Մենք բոլորս մեղավորներ ենք, սակայն Նրա շնորհիվ փոխակերպվում և լիանում ենք»: