Չինաստանի իշխանությունները խստացրել են պահանջները օտարերկրյա երաժիշտների նկատմամբ այն բանից հետո, երբ Էլթոնը Ջոնը նոյեմբերին Պեկինում տեղի ունեցած իր համերգը նվիրել է իշխանությունների կողմից մերժված նկարիչ և ակտիվիստ Այ Վեյվեյի «հոգուն և տաղանդին»: Այս մասին հաղորդում է The Guardian-ը՝ վկայակոչելով իրավիճակին ծանոթ աղբյուրներին:
Գործակալության զրուցակիցների խոսքերով՝ Էլթոն Ջոնի ելույթից հետո եկել են ոստիկանության ներկայացուցիչներ, որոնք երգչի մենեջերից պահանջել են ստորագրել հայտարարություն այն մասին, թե երաժիշտը նկատի է ունեցել, որ իրեն ոգեշնչում է բացառապես Այ Վեյվեյի արվեստը: Պարբերականը նշում է, որ Էլթոն Ջոնի ներկայացուցիչը հերքել է այս տեղեկատվությունը:
Բրիտանական ամսագրի աղբյուրները հաղորդել են, որ սկանդալային համերգից հետո Չինաստանի մշակույթի նախարար Ցայ Վուն պահանջել է, որպեսզի հանրապետությունում ելույթ ունենալու արտոնագիր ստանան միայն երաժշտական բարձրագույն ուսումնական հաստատությունների սաները:
Չինաստանի մշակույթի նախարարությունը հերքել է այս տեղեկատվությունը, սակայն The Guardian-ի այլ զրուցակիցներ հաստատել են, որ 2013 թ. սկզբից ակադեմիակական երաժշտություն նվագող երաժիշտներից Չինաստանում ելույթի արտոնագիր ստանալուց առաջ պահանջում են ներկայացնել իրենց կրթությունը և որակավորումն ապացուցող փաստաթուղթ:
Ամսագրի զրուցակիցներից մեկը նշել է, որ հավանական է՝ կանոնները չեն փոխվել, սակայն, անկասկած, դրանք ավելի խիստ են դարձել, և հավելել է, որ մի քանի երաժիշտների արդեն մերժել են արտոնագիր տրամադրել:
