«Պարույր Հայրիկյանի վրա կրակելուց երկու օր առաջ ստորագրել ենք թուղթ, այնտեղ կա շատ մի կարևոր կետ՝ ցուցակների հետ կապված։ Ես կուզեի, որ այն երկուսը հավատարիմ մնան այդ կետին՝ առ այն, որ պաշտոն չեն ստանալու և չեն շնորհավորելու իշխանության թեկնածուին: Բայց այդ կետն արդեն իսկ խախտվել է»,- այսօր լրագրողների հետ հանդիպման ընթացքում հայտարարեց ՀՀ նախկին վարչապետ, ՀՀ նախագահի թեկնածու Հրանտ Բագրատյանը. «Կոնկրետ Պարույր Հայրիկյանը չեմ լսել, որ քննադատի իշխանությանը, ասեմ ավելին՝ կոռուպցիայի դեմ ավելի սուր խոսում է Սերժ Սարգսյանը: Նրանք խախտեցին մեր ստորագրությունը, ճիշտ հակառակ հայտարարությունը հնչեց՝ կշնորհավորենք իշխանության թեկնածուին: Ես համոզված չեմ, որ նրանք ընդդիմադիր են, իսկ եթե այդպես է՝ թող մնան ընդդիմադիր կեցվածքին հավատարիմ:
Հրանտ Բագրատյանի համար անհասկանալի են Պարույր Հայրիկյանի պահանջները՝ կապված միասնական թեկնածուով հանդես գալու հետ.
«Առաջինը դու հանիր թեկնածությունդ և օրինակ ցույց տուր,- ասաց Հրանտ Բագրատյանը, ապա հավելեց,- ասում է՝ եթե միասնական թեկնածու ենք՝ կդիմեմ Սահմանադրական դատարան, եթե ոչ՝ ապա ոչ. բացարձակապես տրամաբանական կապ չեմ տեսնում։
Հայտարարում է՝ եթե միասնական թեկնածու չլինի, ընտրությունները կկայանա ճիշտ ժամանակին: Իսկ ո՞վ է ուզում, որ ընտրությունները կայանան ճիշտ ժամանակին՝ իհարկե ՍԵրժ Սարգսյանը:
Ես սա կարող եմ ընկալել միայն այս կերպ՝ «Գնա ստիպիր, դարձեք միասնական թեկնածու, հետո էլ շնորհավորեք իշխանության թեկնածուին»։ Թող ինձ հակառակը համոզեն»:
Լուսանկարը՝ PanARMENIAN Photo-ի
