«Անհաղթահարելի խոչընդոտը» միասնական թեկնածու փնտրելու հետ չպետք է խառնվեր: Այսօր «Առաջին լրատվական»-ի հետ զրույցում այս մասին ասաց ՀՀ ԱԺ անկախ պատգամավոր Էդմոն Մարուքյանը՝ անդրադառնալով ՀՀ նախագահի թեկնածու Պարույր Հայրիկյանի հայտարարությանը, թե ՍԴ ներկայացրած իր դիմումը հետ կվերցնի այն դեպքում, երբ միավորում տեղի ունենա իր և նախագահի թեկնածուներ Րաֆֆի Հովհաննիսյանի, Հրանտ Բագրատյանի միջև:
Էդմոն Մարուքյանը նշեց, որ եթե միավորում տեղի ունենա, երբ արդեն ԿԸՀ-ում ինքնաբացարկի դիմում ներկայացնելու ժամկետն ավարտվել է, քվեաթերթիկում լինելու են բոլոր այն թեկնածուների անունները, որոնք այսօր գրանցված են:
Ըստ նրա՝ թեկնածուները կարող են միանալ մեկին ու ժողովրդին կոչ անել իրենց չքվեարկել, այլ քվեարկել միասնական թեկնածուի օգտին: «Բայց իրենք լինելու են քվեաթերթիկում, որն ընտրողի մեջ կարող է թյուրըմբռնում առաջացնել: Ուստի եթե միավորում արվում է, նպատակահարմար է մինչև ինքնաբացարկների ժամկետը դա անել, որպեսզի այդ թեկնածուները ներկայացված չլինեն քվեաթերթիկում:
Իրավական առումով քվեաթերթիկն այլևս անփոփոխ է»,- մեկնաբանեց Էդմոն Մարուքյանը:
Նա, սակայն, նշեց, որ ՀՀ նախագահական ընտրությունները երկշաբաթյա ժամկետով հետաձգելու դեպքում հետաձգվում է նաև ինքնաբացարկ ներկայացնելու ժամկետը: Պատգամավորը հղում կատարեց ՀՀ Ընտրական օրենսգրքի 87-րդ հոդվածի 5-րդ կետին, որի համաձայն՝ Հանրապետության նախագահի թեկնածուն քվեարկության օրվանից ոչ ուշ,
քան 10 օր առաջ` մինչև ժամը 18:00-ն, դիմում ներկայացնելու դեպքում իրավունք
ունի հանելու իր թեկնածությունը:
«ՀՀ Սահմանադրության 52-րդ հոդվածում հստակ նշվում է, որ եթե թեկնածուներից մեկի համար անհաղթահարելի խոչընդոտներ են առաջանում, ընտրությունները հետաձգվում են երկշաբաթյա ժամկետով, այսինքն՝ այս հիմքով ընտրությունների հետաձգման այլ տարբերակ և հնարավորություն չկա: Մյուս տարբերակը նոր ընտրությունն է այն դեպքում, երբ անհաղթահարելի ճանաչված խոչընդոտը չվերանա: Թեկնածուն կարող է պնդել, որ չեն վերացել խոչընդոտները:
Այստեղ կարող ենք այլ տարբերակ ևս քննարկել, որ երկշաբաթյա ժամկետի ավարտից հետո մեկ այլ թեկնածուի մոտ կարող է առաջանալ անհաղթահարելի խոչընդոտ, և նա էլ իրավունք ունի դիմել Սահմանադրական դատարան: Սակայն ճանաչել, որ խոչընդոտը չի վերացել, ճանաչել, որ խոչընդոտ կա, ճանաչել, որ խոչընդոտ չկա՝ ՍԴ-ի որոշելիք հարցերն են»,- մանրամասնորեն ներկայացրեց անկախ պատգամավոր Էդմոն Մարուքյանը:
Ինչ վերաբերում է Պարույր Հայրիկյանի դեպքում առաջացած անհաղթահարելի խոչընդոտին՝ պատգամավորը դժվարանում է մեկնաբանություններ անել, քանի որ ՍԴ-ն պետք է որոշում կայացնի, իսկ ինքը ծանոթ չէ Պարույր Հայրիկյանի ՍԴ ներկայացրած դիմումին և չգիտի, թե թեկնածուն ինչ փաստարկներ է ներկայացրել, որը պետք է հիմք հանդիսանա խոչընդոտն անհաղթահարելի ճանաչելու և չճանաչելու համար:
Մարուքյանը նշված հարցը որոշելը ՍԴ-ի բացառիկ իրավասությունն է համարում: «Երբ բանավոր ներկայացվի, մեզ համար պարզ կլինի, թե ինչով է անհաղթահարելի խոչընդոտը: Ես ենթադրում եմ, որ խոչընդոտը նրա առողջությանը հասցված վնասն է, որը չի կարողանում նա հաղթահարել և շարունակել քարոզարշավը: Բայց սա ենթադրություն է»,- ասաց նա:
Պատգամավորի համոզմամբ՝ ստեղծված իրավիճակն աննախադեպ իրավիճակ է. ՀՀ սահմանադրությունն այս առումով տալիս է հստակ ուղղություններ: ՀՀ Սահմանադրական դատարանի մասին օրենքը, սակայն, նրա խոսքով, մի քիչ ավելի մանրամասն ընթացակարգային խնդիրները լուծելու առումով բավարար չէ:
«Այս պահի դրությամբ ՀՀ Սահմանադրական դատարանի մասին օրենքի 75-րդ հոդվածով սահմանված է, որ թեկնածուներն իրենց առնչվող հարցերով կարող են դիմել ՀՀ Սահմանադրական դատարան, հոդվածի 5-րդ մասն ասում է, որ ՀՀ Սահմանադրական դատարանը կարող է անհաղթահարելի ճանաչել այն խաչընդոտները, որոնք արդեն իսկ առաջացել են և տվյալ թեկնածուից անկախ պատճառներով անհնարին են դարձնում նրա հետագա մասնակցությունն ընտրական գործընթացներին»,- մեջբերեց օրենքը Էդմոն Մարուքյանը:
Եզրափակելով խոսքը՝ նա ասաց, որ «անհաղթահարելի խոչընդոտը» միասնական թեկնածու փնտրելու հետ չպետք է խառնվեր: Թե ինչու է այսպես ստացվել՝ Պարույր Հայրիկյանը կարող է պարզաբանել: «Անգամ Բագրատյանը նրան պատասխանելիս ասել էր՝ մեկը մյուսի հետ կապ չունի: Ես համաձայն եմ նրա հետ, որ խոչընդոտը մի բան է, իսկ քաղաքական առումով ընդդիմադիր դաշտում միասնական թեկնածուի հասնելը՝ մեկ այլ բան»,- նշեց ՀՀ ԱԺ անկախ պատգամավոր Էդմոն Մարուքյանը:
Հիշեցնենք, որ ՀՀ նախագահի թեկնածու, ԱԻՄ առաջնորդ Պարույր Հայրիկյանն այսօր դիմեց ՀՀ ՍԴ իրեն հարուցված խոչընդոտն անհաղթահարելի ճանաչելու պահանջով: Չի բացառվում, որ ՀՀ նախագահական ընտրությունները հետաձգվեն երկշաբաթյա ժամկետով:
