Շաբաթ օրը ՀՀ ոստիկանությունը «Ոստիկանության գործունեության լուսաբանման առանձնահատկությունները» թեմայով սեմինար քննարկում էր կազմակերպել Ծաղկաձորում: Անմիջական, ոչ պաշտոնական հանդիպման նպատակը, ՀՀ ոստիկանության հասարակայնության հետ կապերի վարչության պետ Աշոտ Ահարոնյանի խոսքերով, փորձն է խոսել այն խնդիրներից, որոնք հաճախ ծագում են մեր աշխատանքում: Լրագրողները շատ հաճախ հանդիպում են խնդիրների, հետևաբար փորձ արվեց միասին վեր հանել այդ խնդիրներն ու տեսնել՝ որոնք են ավելի սուբյեկտիվ, և որոնք՝ օբյեկտիվ:
Հանդիպմանը ներկա էին բարձրաստիճան պաշտոնյաներ՝ ոստիկանապետ Ալիկ Սարգսյանի գլխավորությամբ:
Քննարկումներն անցան շատ ակտիվ։ Ալիկ Սարգսյանը պատրաստակամություն հայտնեց էլ ավելի բաց ու թափանցիկ աշխատել լրագրողների հետ:
Լրագրողները ցանկանում էին, որ ոստիկանությունն ավելի օպերատիվ և բաց ինֆորմացիա տրամադրի, բնականաբար՝ հնարավորությունների սահմաններում։ Սա, ինչպես ցույց տվեցին քննարկումները, ոստիկանության կողմից առարկության չարժանացավ:
Ալիկ Սարգսյանը նշեց, որ խիստ կարևորում է այս հանդիպումը, որովհետև վերջին ժամանակներս մշտապես զգում է, որ լրագրողների հետաքրքրությունը ոստիկանության, ոստիկանական գործունեության նկատմամբ մեծանում է։ «Համոզված եմ՝ այսօրվա հանդիպումը ինչ-որ առումով կնպաստի, որ դուք ունենաք ամբողջական պատկերացում, թե ինչ է կատարվում մեր համակարգում:
Ես փորձում եմ տարբեր մամլո ասուլիսների, տարբեր հանդիպումների ընթացքում, նույնիսկ փողոցում, նույնիսկ կառավարության շենքում ցանկացած միջոցառման ժամանակ, երբ ինձ մոտենում են լրագրողները, երբևէ չհրաժարվել մեկնաբանություններից: Չեմ խուսափել, թեկուզ հաճախ հայտնվում եմ այնպիսի վիճակում, երբ կոնկրետ ինֆորմացիա է պահանջվում, և թվում է, թե շատ հեշտ է ասել՝ «այո» կամ «ոչ»: Սակայն դա ամենավտանգավորն հարցն է, քանի որ կան ինֆորմացիաներ, որոնք բազմակողմանի ուսումնասիրություն են պահանջում, և հնարավոր չէ նման հարցերին միանշանակ պատասխանել»,- պարզաբանեց Ալիկ Սարգսյանը:
