Ընդհանրապես մարդը 40 օր շարունակ կարող է հաց չուտել, բայց նրա օրգանիզմում կարող է առաջանալ ինտոքսիկացիա՝ ինքնաթունավորում: Առաջին 10-15 օրը համեմատաբարավելի հեշտ է անցնում՝ կարող է նկատվել սրտխառնոց, գլխապտույտ, գխացավ, ճնշման տատանում, բայց հետագայում կարող ես շատ ավելի բարդ խնդիրների առջև կանգնել՝ «Առաջին լրատվական»-ի հետ զրույցում ասաց բժիշկ,ընդհանուր թերապևտ Տաթևիկ Արշակյանը՝ խոսելով ՀՀ նախագահի թեկնածու, արդեն 19 օր հացադուլ հայտարարած Անդրիաս Ղուկասյանի մասին:
«Ստամոքսն արտադրում է պեպսին, երբ այն ուրիշ ոչինչ չի ունենում քայքայելու՝ տվյալ դեպքում բացակայում է ուտելիքը, սկսում է քայքայել ստամոքսի և կերակրափողի լորձաթաղանթը՝ նպաստելով տարատեսակ էրոզիաների և խոցերի առաջացմանը: Կարճ ասած՝ օրգանիզմը սկսում է ինքն իրենով սնվել, այսպիսով ամբողջովին շարքից հանել մնացած բոլոր օրգանները: Առաջին հերթին, իհարկե, ստամոքսը, հետո աղիքները, ապա՝ ենթաստամոքսային գեղձը և այսպես շարունակ: Առաջին երկու շաբաթների ընթացքում հնարավոր է ոչինչ չլինի, եթե մարդը մինչ այդ կատարյալ առողջ է, բայց արդեն 15-րդ օրվանից սկսած հացադուլը կարող է ամբողջությամբ շարքից հանել ստամոքսը, չնայած այն ընդունված կարծիքին, որ մարդը կարող է 40 օր չսնվել: Իսկ մենք գիտենք, թե որքան երկարատև ժամանակ է պահանջումաղեստամոքսային հիվանդությունների բուժումը: Շատ խորանալու դեպքում նույնիսկ երբեմն անհնար է դառնում բուժել»,- ասաց Տ. Արշակյանը:
Բացի վերը նշված վտանգներից, Տ. Արշակյանը նաև նշեց, որ օրգանիզմում ուտելիքի երկարաժամկետ բացակայությունը՝ 20 օր և ավելի, կարող է շարքից հանել նաև ոսկորները. «Ուտելիքի միջոցով մարդը ստանում է կալցիում, քանի որ տվյալ դեպքում նա ո՛չ միայն չի սնվում, այլ նաև անհրաժեշտ վիտամիններ չի ընդունում, իսկ հացադուլի կանոնները պահանջում են նաև վիտամինների բացակայություն, ապա շատ հնարավոր է, որ տվյալ անձն ունենա ոսկորների և հոդերի ամենատարբեր և ամենավտանգավոր խնդիրներ:Բացի այդ, մարդը չսնվելու ընթացքում կունենա երիկամների հետ կապված խնդիրներ, ինչպես նաև սակավարյունություն՝ սկսած 25-րդ օրվանից, ինչը շատ վտանգավոր է»:
Բժշկուհին նաև նշեց, որ հացադուլից հետո չի կարելի միանգամից հաց ուտել, քանի որ այդ ընթացքում ստամոքսը շատ փոքրանում է և միանգամից մեծ քանակությամբ ուտելիք ընդունել չի կարող. «Մարդիկ սովորաբար հացադուլից անմիջապես հետո մեծ քանակությամբ ուտելիք են ընդունում՝ այդ հանգամանքը հաշվի չառնելով, ինչն էլ կարող է առաջացնել իմ վերը նշած ստամոքսային հիվանդություններից ցանկացածը»:
Տաթևիկ Արշակյանի խոսքով՝ եթե մարդը մինչ հացադուլ հայտարարելն ունի առողջական որևէ խնդիր, այսինքն՝ որևէ օրգան հիվանդ է, ապա հացադուլի ընթացքում առաջինը քայքայվում է հենց այդ օրգանը. ի դեպ, գործընթացը սկսվում է հացադուլի հենց երկրորդ օրվանից»:
Հիշեցնենք, որհաշվի առնելով այն հանգամանքը, որ հացադուլի 20-րդ օրվանից սկսած մարդու օրգանիզմում կարող են առաջանալ և զարգանալ առողջությունը վնասող անդառնալի պրոցեսներ, որոնց հետագա բուժումը կարող է չափազանց դժվար կամ նույնիսկ անհնար լինել, ՀՀ առողջապահության նախարար Դերենիկ Դումանյանը փետրվարի 8-ին ՀՀ նախագահի թեկնածու Անդրիաս Ղուկասյանին կատարած այցի ժամանակ նրան առաջարկել էր շատ կարճ ժամանակաընթացքում հիվանդանոցային պայմաններում լաբորատոր-գործիքային անհրաժեշտ հետազոտություններ անցնել, ինչը հնարավորություն կտար մասնագիտական վերջնական գնահատական տալ նրա առողջական վիճակի վերաբերյալ։
Նախարարի հորդորին ի պատասխան Անդրիաս Ղուկասյանը և նրա բժիշկները որոշել են հրաժարվել առաջարկից և ընտրել են այլ ճանապարհ` փետրվարի 11-ին, հացադուլի վայրը չլքելով, տեղում հանձնել արյան և այլ անալիզներ։
