Հայաստանում ընտանիքի առջև կանգնած առավել կարևոր հիմնախնդիրներից ամենամտահոգիչը գործազրկությունն ու աշխատատեղերի բացակայությունն է: «ՀՀ իշխանությունների գործունեության գնահատականները. տեսանելիությունը, ձեռքբերումներն ու բացթողումները և զարգացման ռազմավարական առաջարկները» սոցիոլոգիական հետազոտության համաձայն՝ այսպես է կարծում հարցված քաղաքացիների 47.2%-ը: Սոցիոլոգիական հետազոտությունն իրականացրել է «Այ Փի Էս Սի» քաղաքական և սոցիոլոգիական խորհրդատվությունների ինստիտուտը:
Գործազրկությունից հետո մարդիկ նշել են ֆինանսական խնդիրներն ու աղքատությունը՝ 14.4%, ցածր աշխատավարձը՝ 12.0%, բնակարանային խնդիրը՝ 11.8%, առողջական խնդիրները՝ 7.8%, ցածր թոշակն ու նպաստը՝ 4.5%, արտագաղթը՝ 3.7%:
Ընդ որում՝ ՀՀ քաղաքացիներն իրենց խնդիրների համար հիմնական պատասխանատու համարում են կառավարությանը և երկրի նախագահին: Այսպես. գործազրկության հարցում կառավարությանը մեղավոր է համարում քաղաքացիների 43.1%-ը, նախագահին՝ 25%-ը, բնակարանային խնդրում կառավարությունը մեղավոր է 41.5%-ով, նախագահը՝ 19.9%-ով, ցածր աշխատավարձի հարցում կառավարությունը՝ 50.3%-ով, նախագահը՝ 23.2%-ով, ցածր թոշակի հարցում կառավարությունը՝ 50.8%-ով, նախագահը՝ 20.8%-ով, արտագաղթի հարցում կառավարությունը՝ 44%-ով, նախագահը՝ 27%-ով:
Նշենք, որ հարցումն իրականացվել է ՀՀ կառավարության պատվերով՝ 2012թ. նոյեմբերին, 1.600 հարցվողների շրջանում, որից 562-ը` մայրաքաղաքում, 1.038-ը` ՀՀ 10 մարզերում:
