Այսօր Հայաստանի առաջնության 4-րդ տուրի շրաջանակում «Բանանց»-ը «Միկա» մարզադաշտում ընդունեց «Փյունիկ»-ին, իսկ Գյումրիի «Շիրակ»-ը, Իջևանի «Արնար» մարզադաշտում հյուրընկալեց «Ուլիս»-ին: Երկու հանդիպումներն էլ գոլառատ ստացվեցին:
«Բանանց»-ը չեմպիոնի հետ խաղում, չնայած երկու անգամ առջևում էր հաշվի մեջ` 1:0 և 2:1 հաշվով, ոչ միայն չկարողացավ պահպանել առավելությունը, այլև պարտություն կրեց` 3:4 հաշվով: Հանդիպման 5-րդ րոպեին հաշիվը բացեց Արտակ Դաշյանը, 11 րոպե անց Գևորգ Ղազարյանը հավասարեցրեց այն: 32-րդ րոպեին Բրունո Կորեան երկրորդ անգամ առաջ մղեց տանտերերին: Առաջին խաղակեսի վերջին րոպեին Հովհաննես Հովհաննիսյանը կրկին հավասարեցրեց հաշիվը` 2:2:
Երկրորդ խաղակեսում թիմերը շարունակում էին հավասար և բաց ֆուտբոլ խաղալ: 54-րդ րոպեին արդեն առաջ անցավ «Փյունիկ»-ը. Արտակ Ալեքսանյանը գրավեց Ստեփան Ղազարյանի պաշտպանած դարպասը: Տանտերերին նույնպես հաջողվեց հավասարեցնել հաշիվը. 80-րդ րոպեին Արսեն Բալաբեկյանը հրաշալի իրացրեց տուգանային հարվածը: Վերջին խոսքն ասեցին Վարդան Մինասյանի սաները` Գևորգ Ղազարյանը խփեց այս խաղում իր երկրորդ և «Փյունիկ»-ի հաղթական գնդակը:
«Շիրակ»-«Ուլիս» խաղում գրանցվեց 4 գոլ: Հանդիպումն անցավ հյուրերի բացահայտ առավելությամբ: Գեորգի Կրասովսկին 26-36 րդ րոպեն ընկած հատվածում դարձավ դուբլի հեղինակ: Գյումրեցիներին առաջին խաղակեսում հաջողվեց կրճատել հաշվի տարբերությունը` 41-րդ րոպեին աչքի ընկավ Կարեն Խաչատրյանը:
58-րդ րոպեին Վալերի Ալեքսանյանը կրկին վերականգնեց հյուրերի երկու գնդակի առավելությունը: Մինչև խաղավարտ Սևադա Արզումանյանի սաները կարող էին ևս մի քանի անգամ գոլի հեղինակ դառնալ, սակայն հաշիվը մնաց անփոփոխ. «Շիրակ»-«Ուլիս»` 1:3:
«Առաջին լրատվականը» տեղեկացրել էր, որ երերկ կայացած հանդիպումներում «Միկա»-ն 3:2 հաշվով հաղթել էր «Իմպուլս»-ին, իսկ «Արարատ»-«Գանձասար» խաղում գրանցվել էր 0:1 հաշիվը: Այսպիսով, Հայաստանի առաջնության 4-րդ տուրի 4 հանդիպումներում գրանցվեց 17 գնդակ:
Այս տուրից հետո «Ուլիս»-ը, վաստակած 10 միավորով, գլխավորում է մրցաշարային աղյուսակը: Երկրորդ և երրորդ տեղերը` 8-ական միավորով, կիսում են «Գանձասար»-ն ու «Միկա»-ն: «Փյունիկ»-ը 7 միավորով չորրորդն է, «Շիրակ»-ը 4 միավորով` հինգերորդը: «Իմպուլս»-ն ունի` 3, «Բանանց»-ը` 2, «Արարատ»-ը`1 միավոր:
