Mignews.com կայքի հաղորդմամբ, Ավստրիայի լուսավորության նախարարությունն աշխատում է ուսուցման նոր ծրագրի վրա, որում նախատեսում է թուրքերենը դարձնել երկրորդ օտար լեզու:
Կրթական համակարգում թուրքերենը ներդրվում է նրա համար, որ բարձր դասարանի աշակերտները դրանով կարողանան բուհ ընդունվելու քննություն հանձնեն:
Նշվում է, որ դրանով թուրքերենը կհավասարեցվի այնպիսի լեզուներին, ինչպիսիք են ֆրանսերենը, ռուսերենը, լեհերենը, ինչպես նաև բոսնիերենը, սերբերենն ու խորվաթերենը, որոնց համար արդեն իսկ գործում են նմանատիպ ծրագրեր:
Հիշեցնենք, որ պաշտոնական տվյալներով, Ավստրիայում բնակվում է 263.000 թուրք, սակայն իրականում դրանց քանակն առավել մեծ է:
Ի դեպ, 2010 թվականի նոյեմբերին ավստրիական լրատվամիջոցներին տված հարցազրույցում Ավստրիայում Թուրքիայի դեսպան Էջվեթ Թեզջանն ավստրիական իշխանություններին մեղադրել էր տեղի թուրքերի նկատմամբ ձուլման քաղաքականություն վարելու մեջ` նշելով, թե ավստրիաբնակ թուրքերը երկրի իշխանությունների կողմից ընկալվում են որպես «վիրուսներ»:
Այն ժամանակ դա դիվանագիտական լուրջ սկանդալ հարուցեց Վիեննայի և Անկարայի միջև: Ավստրիան սպառնաց խոչընդոտներ հարուցել ԵՄ-ին Թուրքիայի լիիրավ անդամակցության հարցում: Իսկ այժմ Ավստրիայի նախագահ Հայնց Ֆիշերը սպառնում է թուրք դեսպանի պատճառով բոյկոտել իր թուրքական այցը:
