«Առաջին լրատվական»-ի հիմնադիր «Սկիզբ Մեդիա կենտրոն» ընկերության փաստաբան Նիկոլայ Բաղդասարյանը տեղեկացրեց, որ այսօր ԴԱՀԿ Կենտրոն և Նորք-Մարաշ բաժնի հարկադիր կատարող Գ. Սախոյանին է հանձնվել գրություն և փաստաթղթեր այն մասին, որ ընկերության հաշվեկշռում գույք չկա: Հիշեցնենք, որ երեկ հարկադիր կատարողը ներկայացել էր «Առաջին լրատվական»-ի խմբագրություն՝ կալանք դնելու ընկերության գույքի վրա: Հունվարի 15-ին նման որոշում էր կայացրել Կենտրոն և Նորք-Մարաշ համայնքների ընդհանուր իրավասության դատարանը: Ընկերության գույքի և դրամական միջոցների վրա կալանք դնելու միջնորդություն էր ներկայացրել նախկին նախագահ Ռոբերտ Քոչարյանի և նրա որդի Սեդրակ Քոչարյանի ներկայացուցիչ Ա. Մելիքբեկյանը:
Քոչարյանները որոշել են, որ իրենց պատիվն ու արժանապատվությունը արատավորվել է այն հոդվածի արդյունքում, որտեղ հրապարակված է եղել, որ 2006թ. «Նաիրիտ» գործարանի սեփականաշնորհումը կատարվել է Ռ. Քոչարյանի անմիջական հսկողությամբ, և որ նախկին նախագահն անմասն չի մնացել այդ գործընթացից: Քոչարյանների պատիվն ու արժանապատվությունը վիրավորել է նաև մեր մեկ այլ հրապարակում, որտեղ նշված էր, թե «Քոչարյանի ավագ որդուն՝ Սեդրակին է պատկանում «ՎիվաՍել» ծառայությունից բջջային հեռախոսով համեմատաբար ցածր սակագնով միջազգային հեռախոսազանգեր իրականացնելու VoIP ծառայությունը»: Ընդ որում, հրապարակումները միակողմանի չեն եղել, հարցում է արվել Ռ. Քոչարյանի գրասենյակի ղեկավար Վիկտոր Սողոմոնյանից, և նրա պատասխանը ներգրավվել է հոդվածում:
Քոչարյաններն այս հրապարակման համար դիմել էին դատարան իրենց պատիվն ու արժանապատվությունը վիրավորելու համար 5 մլն դրամ փոխհատուցելու պահանջով: Միաժամանակ միջնորդել էին, որ դատարանը կալանք դնի «Սկիզբ Մեդիա Կենտրոնի» գույքի ու դրամական միջոցների վրա: Դատարանը մերժել էր կալանք դնել դրամական միջոցների վրա, բայց որոշել էր կալանքի տակ առնել գույքը: Բայց քանի որ ընկերությունը որևէ գույք չունի, ԴԱՀԿ-ին չի հաջողվել կալանք դնել: Ընկերության կողմից օգտագործվող գույքը հանդիսանում է ֆիզիկական անձի սեփականություն, որն անհատույց օգտագործման է տրվել:
«Սկիզբ Մեդիա Կենտրոն»-ը դեռ դատարանից Քոչարյանների ներկայացուցչի հայցադիմումը և կից փաստաթղթերը չի ստացել, թեպետ մեր ճնշմամբ այն փոստով ուղարկվել է: Դատարանը վարույթ ընդունած գործով առայժմ նիստ չի նշանակել: Իսկ մենք մեր դիրքորոշման մասին կտեղեկացնենք հայցադիմումը ստանալուց հետո: