«Բնակի՛չ, դարձի՛ր քաղաքացի, տեր, պահանջատեր», «Անհնազանդ ենք անօրինությանը, հանքահենությանը», «Ինքնորոշված քաղաքացին թաղում է օլիգարխիան», «Ո՛չ ռեժիմին, այո՛ ազգային միասնությանը». այս կարգախոսների ներքո այսօր ԿԸՀ շենքից մեկնարկեց «Վերջ ռեժիմին» խորագրով ակցիան: Ինչպես «Առաջին լրատվական»-ի հետ զրույցում տեղեկացրեց ակտիվիստ, ակցիայի կազմակերպիչ Աննա Շահնազարյանը, ակցիայի մասնակիցները ՀՀ ԿԸՀ-ից պահանջում են, որ հակասահմանադրական կուսակցության առաջնորդը՝ Սերժ Սարգսյանը, չկարողանա մասնակցել գալիք նախագահական ընտրություններին, իսկ մյուս պահանջն ուղղված է ԵԱՀԿ անդամ երկրների դեսպաններին, որպեսզի նրանք իրենց ներկայացուցիչներին դուրս բերեն ԵԱՀԿ/ԺՀՄԻԳ դիտորդական առաքելությունից, քանի որ դրանց շնորհիվ այս ապօրինի կուսակցությունը ձեռք է բերում վստահություն:
«Մեր պահանջը նույնն է, ինչ Անդրիաս Ղուկասյանինը: Մենք՝ քաղաքացիներս, ընտրական իրավունք իրացնելու հնարավորություն չունենք կեղծիքների դեպքում, հնարավոր չէ կասեցնել դա, քանի որ ընտրություններին մասնակցում է ՀՀԿ-ն, իսկ այս գործընթացին սատարում են միջազգային դիտորդները»,- նշեց Աննա Շահնազարյանը:
Բնապահպան Լևոն Գալստյանն ասաց, որ մասնակցում է ակցիային, փորձում քաղաքացիական գիտակցություն արթնացնել՝ չմոռանալով բնապահպանական մասը:
«Առաջին լրատվական»-ի հետ զրույցում ԱԺ նախկին փոխխոսնակ Կարապետ Ռուբինյանն ասաց, որ միջոցառումը կարևոր է, քանի որ ուղղված է նրան, որպեսզի մինչև ընտրությունները ինչ-որ ազդեցություն ունենան այն մարդկանց վրա, որոնք հերթական անգամ փորձում են կեղծել ընտրությունները, և այն մարդկանց վրա, որոնք հերթական անգամ անհեթեթ գնահատական են պատրաստվում տալ, թե սա ևս մեկ քայլ առաջ է: Անդրադառնալով Անդրիաս Ղուկասյանի հացադուլին՝ նա ասաց, որ այն մինչև երեկ ընդունելի էր: Սակայն, Ռուբինյանի խոսքով, նա արդեն հյուծված վիճակում է, ուստի կոչ է անում դադարեցնել հացադուլը:
«Վե՛րջ ռեժիմին» ակցիայի մասնակիցները ԿԸՀ շենքից շարժվեցին դեպի Բաղրամյան պողոտա՝ ԵԱՀԿ/ԺՀՄԻԳ դիտորդական առաքելության երևանյան գրասենյակ: Սակայն Բաղրամյան պողոտայում ակցիան անակնկալ շրջադարձ ունեցավ: Ակցիայի շուրջ 50 մասնակիցներ իրենց պահանջը ներկայացնելով ԵԱՀԿ/ԺՀՄԻԳ գրասենյակի մոտ՝ որոշեցին շարժվել դեպի նախագահական նստավայր՝ իրենց բողոքը նաև գործող նախագահին հայտնելու, սակայն ոստիկանության հարյուրավոր աշխատակիցներ փակեցին ցուցարարների ճանապարհը՝ թույլ չտալով առաջ շարժվել:
ՌԱՀՀԿ փորձագետ, ակցիայի կազմակերպիչ Սարո Սարոյանը բանակցություններ սկսեց փոխոստիկանապետ Վալերի Օսիպյանի հետ, ում ներկայացրեց, որ ինքնաբուխ է որոշումը կայացվել, սակայն Օսիպյանը հակադարձեց՝ մեջբերելով ՀՀ Սահմանադրության այն կետը, համաձայն որի՝ ցուցարարները խոչընդոտում են այլոց ազատ շարժվելու իրավունքը, իսկ ոստիկանները փորձում են սահմանադրական կարգը պահել:
Բանակցություններին միացան արդեն շուրջ 15 օր հացադուլ հայտարարած Անդրիաս Ղուկասյանն ու Աշոտ Մանուչարյանը: Երկար բանակցություններից հետո ակցիայի մասնակիցներին հաջողվեց շարժվել դեպի ՀՀ նախագահի նստավայր, որտեղ և ակցիան ավարտվեց:
Մանրամասներին առաջարկում ենք ծանոթանալ տեսանյութի միջոցով:
