«Առաջին լրատվական»-ի զրուցակիցն է Վրաստանի խորհրդարանի եվրաինտեգրման հարցերով հանձնաժողովի նախագահ Վիկտոր Դոլիձեն: Նա «Եվրանեսթ» խորհրդարանական վեհաժողովում ստանձնեց համանախագահի պաշտոնը Ուկրաինան ներկայացնող Բորիս Տարասյուկի փոխարեն:
-Պարո՛ն Դոլիձե, Եվրամիությունը Արևելյան գործընկերության անդամ երկրներին պատրաստվում է նոր փաստաթուղթ առաջարկել: Արդեն իսկ նշվում է, որ Հայաստանին տարբերակված մոտեցում է ցուցաբերվելու։ Հետաքրքիր է` այդ տարբերակված մոտեցումն իրենից ի՞նչ է ներկայացնելու։
–Նախ` ես կցանկանայի ընդգծել, որ թեև Հայաստանը դարձել է Եվրասիական տնտեսական միության անդամ, Եվրամիությունը և Հայաստանը Վիլնյուսում տեղի ունեցած գագաթաժողովում որոշեցին շարունակել համագործակցությունը, ներառյալ` առևտրատնտեսական հարաբերությունները, ինչն, իմ կարծիքով, լավ է: Այս գործընթացը պետք է շարունակվի, և Հայաստանի՝ ԵՏՄ անդամ լինելը չի նշանակում, թե Հայաստանը չի կարող մասնակցել և հաղորդակցվել Եվրամիության հետ այնպիսի հարցերով, ինչպիսին է, օրինակ, Եվրամիության հետ տնտեսական ինտեգրացիան։ Ես միայն կողջունեմ, որ Հայաստանին նման հնարավորություն տրվի, և կարծում եմ, որ հիմա Հայաստանն այդ ուղղությամբ ջանքեր է գործադրում, հետագայում դրանք էլ ավելի կինտենսիվացնի:
–Բայց ենթադրվում է, որ Հայաստանին կտրվի, օրինակ, Բելառուսի կարգավիճակն Արևելյան գործընկերությունում, որն, ըստ էության, չկա էլ, ոչ մի աշխատանք չի տանում այդ գործընկերության շրջանակներում։
–Դժբախտաբար, Բելառուսն ընդհանրապես չի մասնակցում Արևելյան գործընկերության աշխատանքներին մի քանի պատճառներով, թեև պաշտոնապես Արևելյան գործընկերության անդամ պետություն է: Ես Բելառուսը չէի համեմատի Հայաստանի հետ: Դուք լավ պատվիրակություն ունեք, որն ակտիվորեն մասնակցում է բոլոր հանդիպումներին: Ես կցանկանայի, որ Բելառուսն էլ Հայաստանի նման լիներ: Ես Հայաստանին ցանկանում եմ ամենալավը, ուզում եմ, որ Հայաստանն անպայման օգտագործի այս հնարավորությունը:
– Մայիսին Ռիգայում տեղի է ունենալու Եվրամիության գագաթաժողովը, արդեն այդտեղ որևէ բան սպասել կարո՞ղ ենք:
-Ես կարծում եմ, որ պետք է սպասենք: Իմ երկրի համար էլ է շատ կարևոր, մենք մի քանի առաջնահերթություն ենք տեսնում: Առաջինը և ամենակարևորը ազատ վիզային ռեժիմն է Եվրամիության հետ, որը կնպաստի Եվրամիության և ԱլԳ անդամ պետությունների ժողովուրդների հաղորդակցության ինտենսիվացմանը: ։ Բացի այդ՝ մեզ համար առաջնային և կարևոր է Ասոցացման համաձայնագրի վավերացումը:
