Ադրբեջանական SalamNews.org կայքի հաղորդմամբ, Ադրբեջանի Միլի մեջլիսի (խորհրդարան) անվտանգության ու պաշտպանության կոմիտեի անդամ Զահիդ Օրուջն անդրադարձ է կատարել ղարաբաղյան հակամարտության կարգավորմանը. «Ներկայումս ԵԱՀԿ Մինսկի խմբի գործունեությունը կայանում է նրանում, որ «սառեցված» պահի ղարաբաղյան հակամարտությունը` կողմերին արգելելով այն ռազմական ճանապարհով լուծել:
Ես կարծում եմ, որ մենք ուշադիր չենք եղել մարտին Էրդողանի մոսկովյան այցի ժամանակ և մի շարք կարևոր պահեր ենք բաց թողել: Մոսկվայում Էրդողանը հայտարարեց, որ Թուրքիան ողջունում և ընդունում է այն, որ Ռուսաստանն իր ձեռքում է կենտրոնացրել ղարաբաղյան գործընթացի բոլոր թելերը; Այսինքն` դա բաց խոստովանություն էր, որ Թուրքիան նույնպես անհանգստացած է տարածաշրջանում բազամբևեռ ղեկավարման առկայությունից:
Դա հակասում է Թուրքիայի աշխարհաքաղաքական շահերին: Ռուսաստանն էլ, իր հերթին, ղարաբաղյան հակամարտության կարգավորման շուրջ իր ինքնուրույն քայլերը համաձայնեցնում է Թուրքիայի հետ: Ստացվում է, որ գործընթացում ներգրավված մյուս երկրները, կարծես թե, մնում են հետին պլանում:
Ղարաբաղյան գործընթացի հետ կապված` Թուրքիան Ռուսաստանին առաջարկել է ստեղծել նոր ձևաչափ` Թուրքիա-Ռուսաստան-Ադրբեջան-Հայաստան:
Ես շատ եմ ցանկանում, որ դա տեղի ունենա, քանի որ զգում եմ դրա խիստ անհրաժեշտությունը: Հայերը նույնպես հասկանում են, որ ներկայիս ձևաչափով հակամարտությունը չի կարգավորվի: Նրանք քաջ գիտակցում են, որ ժամանակն աշխատում է իրենց դեմ, դրա համար էլ ցանկանում են լուրջ քայլեր ձեռնարկել նոր ձևաչափի հարցում: Կամ էլ նրանք ցանկանում են ընդլայնել ԵԱՀԿ Մինսկի խմբի լիազորությունները»: