«Դա այն հարցն է, որտեղ լրատվամիջոցները` անկախ իրենց քաղաքական ուղղվածությունից` կարող են միավորվել, բայց ես կուզենայի, որ մենք հստակ պատկերացնենք առաջնայնությունները»,- կարծիք հայտնեց Երևանի Մամուլի ակումբի նախագահ Բորիս Նավասարդյանը` անդրադառնալով «Ժամանակ» օրաթերթի գլխավոր խմբագիր Արման Բաբաջանյանի լրատվամիջոցներին արված կոչին` միավորվելու Զրպարտության և վիրավորանքի մասին օրենքում բարեփոխումներ պահանջելու հարցում:
Նավասարդյանի խոսքերով, օրենքը միանշանակ բարելավման կարիք ունի, բայց միևնույն ժամանակ հասկանալի է, որ այդ կարգի օրենսդրության որակյալ փոփոխությունը լուրջ ժամանակ է պահանջում:
«Միջազգային նորմերը տեղայնացնելը բավականին բարդ պրոցես է և կապված է նաև դատական պրակտիկայի լուրջ ուսումնասիրման, ինչպես նաև լրատվամիջոցների ընդհանուր վիճակի ուսումնասիրման հետ»,- «Առաջին լրատվականի» հետ զրույցում ասաց Նավասարդյանը:
Նրա գնահատմամբ, լրագրողական հանրությունն այսօր առաջին հերթին պետք է իր ուշադրությունը կենտրոնացնի հենց դատական պրակտիկայի վրա, որը բոլորովին բավարար չէ և հակասում է միջազգային ստանդարտներին և Մարդու իրավունքների եվրոպական դատարանի նախադեպերին, որոնք մեր օրենսդրության մասն են կազմում.
«Եթե մենք ընկալենք այդ նախադեպերը որպես մեր օրենսդրության մաս, որպես օրենսգրքի լրացուցիչ բովանդակություն, ապա օրենքն այդքան էլ վտանգավոր չի լինի դատարանների ճիշտ գործունեության դեպքում: Գտնում եմ, որ, մտածելով օրենքի բարեփոխման մասին, մենք այսօր պետք է կենտրոնացնենք մեր ուշադրությունը հենց դատարանների գործունեության վրա, և ես հույս ունեմ, որ ՄԻՊ-ը ևս իր նախաձեռնությունը, որը սկսվել էր իր հայտարարությամբ, կշարունակի»:
ԵՄԱ նախագահի կարծիքով, լրատվամիջոցների նկատմամբ դատական գործընթացների ակտիվությունը պայմանավորված է քաղաքական իրավիճակով, որը վերջին ամիսներին բավականին սրվել է.
«Բացի դրանից, առաջիկայում խորհրդարանական ընտրություններ են, և այս պայմաններում, բնականաբար, և՛ առանձին քաղաքական շրջանակներ, և՛ ընդհանրապես իշխանամետ քաղաքական ուժերը բավականին մտահոգված են քննադատական հրապարակումներով, որոնք կարող են ազդել նաև ընտրությունների վրա: Փաստորեն, մենք այսօր տեսնում ենք խաչակրաց արշավ` քննադատական հրապարակումներ իրենց թույլ տվող լրատվամիջոցների դեմ հենց իշխանական օղակների կարկառուն ներկայացուցիչների կողմից»:
