Ընդդիմության դաշտը քայքայելուց, ԲՀԿ-ն կազմալուծելուց հետո Սերժ Սարգսյանը շարունակում է պառակտել ու հեղինակազրկել ոչ իշխանական մյուս ուժերին: Սահմանադրական փոփոխությունների հայեցակարգը քննարկելու պատրվակով ՀՀՇ-ի և «Ժառանգության» ներկայացուցիչների այցելությունը նախագահական պառակտման պատճառ է դարձել այդ կուսակցություններում: Ոմանք շտապել են ընդունել Սերժ Սարգսյանի հրավերը, մյուսները դատապարտում են դա: Այսպես, ՀՀՇ վարչության անդամներ Արարատ Զուրաբյանը և Ալիկ Արզումանյանը հանդիպման հրավերն ընդունել են՝ առանց վարչության անդամ Կարապետ Ռուբինյանի հետ քննարկելու: Թեմայի շուրջ Hraparak.am-ը զրուցել է Կարապետ Ռուբինյանի հետ:
– Պարոն Ռուբինյան, անցած շաբաթ Ձեր կուսակիցները հանդիպել են Սերժ Սարգսյանի հետ` սահմանադրական փոփոխությունների հայեցակարգը քննարկելու, ինչն արժանացավ Ձեր բացասական վերաբերմունքին: Մինչ հանդիպումն արդյոք այդ հարցը քննարկվե՞լ է Ձեզ հետ: Եվ ի՞նչն է կոնկրետ Ձեր բացասական վերաբերմունքի պատճառը, հատկապես, որ ՀՀՇ-ն ի սկզբանե խորհրդարանական կառավարման մոդելի կողմնակից է եղել:
– Ինձ համար միանգամայն անսպասելի էր այդ այցը: Զարմացած եմ, որ նման կարևոր և ակնհայտորեն վիճահարույց որոշումը կայացվել է առանց վարչությունում քննարկելու: Խորհրդարանական կառավարման համակարգին անցնելուն, ճիշտ եք, ՀՀՇ-ն կողմ է արտահայտվել, անձամբ էլ կողմ եմ: Բայց դա ի՞նչ կապ ունի ծավալվող իրադարձությունների հետ: Եթե ռեժիմը պատրաստ է ցանկացած պահի, սեփական շահից դրդված, ոտնահարել Սահմանադրությունը և յուրացնել իշխանությունը, ապա ի՞նչ տարբերություն՝ խորհրդարանական կառավարման համակարգ է այնտեղ նկարագրված, թե նախագահական: Հարց տվե՞լ եք ձեզ, այդ ինչո՞ւ միայն իր լիազորությունների ավարտի նախաշեմին որոշեց մեջտեղ բերել սահմանադրական բարեփոխումների մի ծրագիր, որի մասին ակնարկ անգամ չկար իր նախորդ երկու ընտրարշավների ժամանակ և անցած կառավարման անփառունակ տարիների ընթացքում: Ավելին, նաև այդ ընթացքում կտրուկ դեմ է արտահայտվել այլ ուժերի արած նմանատիպ առաջարկներին: Ակնհայտ է, որ «բարեփոխման» այս պրոցեսը նախաձեռնելը պայմանավորված էր միմիայն Սերժ Սարգսյանի լիազորությունների մոտալուտ ավարտով և բռնազավթված իշխանությունը ոչ մի դեպքում ռեժիմի ձեռքից բաց չթողնելու մոլուցքով:
– Կուսակցության վարչության անդամների հակասական դիրքորոշումը նման առանցքային հարցերի շուրջ ինչի՞ կարող է հանգեցնել, հնարավո՞ր է ստիպի Ձեզ լքել կուսակցությունը:
– Ես տեղյակ չեմ վարչության մյուս անդամների դիրքորոշմանը: Որքան գիտեմ, այդ հարցով նիստ չի գումարվել: Ես ինքս ժամանակավորապես բացակայում եմ երկրից, բայց հիմա կապի միջոցներն այնքան շատ են ու մատչելի, որ ոչինչ չէր խանգարում ինձ հետ նույնպես Բաղրամյան 26 այցի հարցը քննարկելուն կամ գոնե նախապես տեղեկացնելուն: Եթե այդ հանդիպումը նշանավորում է ռեժիմի վերացման խնդրի առաջնահերթության վերանայում և ռեժիմի հետ հարմարվողական քաղաքականության սկիզբ, ապա ես անելիք չեմ տեսնում նման կուսակցությունում:
– Կուսակցությունից դո՞ւրս եք գալու:
– Բաղրամյան 26 այցելածները երևի ինձ, ինչպես և ողջ հասարակությանը, պետք է բացատրություններ տան, թե ինչ ստացան այդ այցից: Մինչ այժմ ռեժիմի վերացումը երկիրը կործանումից փրկելու միակ միջոց համարողներն ինչի՞ դիմաց գիտակցաբար գնացին սպանությունների, բռնությունների, հալածանքների ու կեղծիքների միջոցով իշխանությունը զավթած մեկի հետ սահմանադրական բարեփոխումների հայեցակարգ քննարկելու: Չէ՞ որ գիտեին, որ ռեժիմից զզված և բռնապետին ատող ժողովրդի ճնշող մեծամասնության արհամարհանքին էին արժանանալու: Մինչ այդ բացատրություններն ստանալը, ես կսահմանափակվեմ միայն հայտարարությունով, որ կոպիտ սխալ եմ համարում այդ այցը և չեմ կիսում պատասխանատվությունը դրա համար: Չեմ ուզում, հեռու գտնվելով, հապշտապ որոշում կայացնել:
Ամբողջությամբ` hraparak.am-ում
