Իսրայելական հեռուստատեսությունը երեկ երեկոյան ցուցադրել է Դամասկոսի մոտակայքում գտնվող ռազմահետազոտական կենտրոնի արբանյակային լուսանկարները: Հունվարի վերջին Իսրայելը, իբր, կենտրոնին հասցրել էր ավիահարված:
Դրանցում պարզ երևում է, որ ռազմահետազոտական «Ջամրայա» կենտրոնին ոչ մի վնաս չի հասցվել. ռումբն ընկել է հարակից ճանապարհին՝ նկարներում երևում է վնասված ասֆալտե ծածկույթը:
DigitalGlobe ամերիկյան ընկերությունը, որին են պատկանում լուսանկարները, Reuters-ի հետ զրույցում հաստատել է, որ դրանք արվել են փետրվարի 4-ին:
Իսրայելը փաստորեն փորձում է վավերագրերով ցույց տալ սիրիական իշխանությունների խաբեությունը:
Փետրվարի 2-ին Սիրիայի հեռուստատեսությունը ցուցադրեց քանդված օբյեկտներ, ինչպես նաև վնասված քաղաքացիական ու ռազմական ավտոմեքենաներ: Մեկնաբանության մեջ ասվում է, որ դրանք գիտական կենտրոնի ռմբակոծման հետքերն են: Այդ կադրերը հայտնվել են Reuters-ի տրամադրության տակ և YouTube-ում: