Հայաստանի համար ԵՄ-ն մնում է կարևոր գործընկեր միջազգային քաղաքականության մեջ, և խնդիրը դիտարկվում է ԵՄ-Հայաստան ոչ միայն քաղաքական, այլև տնտեսական, հումանիտար, քաղաքակրթական հարթություններում: Այս մասին «Եվրանեսթի» ԽՎ Երևանում ընթացող նիստից հետո մեզ հետ զրույցում նշեց Հայաստանի ԿԳ նախարար Արմեն Աշոտյանը:
«Ակնհայտ է, որ Հայաստանը շատ ազնիվ է իր բոլոր գործընկերների, այդ թվում ԵՄ-ի հետ: Մեր՝ ԵՏՄ անդամ լինելու հանգամանքն ընդգծում է ՀՀ ունիկալ կարգավիճակը «Արևելյան գործընկերության» շրջանակում, որը կարող է հավակնել դառնալու կապող հանգույց երկու տնտեսական տարածքների համար: Իհարկե, մենք ԵՄ-ի հետ ունենք նաև մեր սեփական օրակարգը, որը քաղաքական է, հասարակական, նաև տնտեսական ու հումանիտար: Այս տարիների կուտակած դրական փորձը թույլ է տալիս լավատեսությամբ նայել ապագային»,- ընդգծեց Աշոտյանը:
Նրա խոսքով՝ ԵՄ-Հայաստան հարաբերությունների հետագա խորացման համար ընտրվում, փնտրվում է նոր իրավական ձևաչափ, որը պետք է արտահայտի երկու կողմերի շահերն ու հետաքրքրությունները ինչպես տարածաշրջանային, այնպես էլ երկկողմ օրակարգի տիրույթում: «Մասնավորապես, հումանիտար ոլորտում ԵՄ նոր ծրագրերը, ինչպիսիք են բարձրագույն կրթության պարագայում «Էրազմուս+»-ը, գիտության ոլորտում՝ «Հորիզոն 2020»-ը, որոնք շատ լավ հնարավորություններ են ընձեռում մաքսիմալ օգտվելու ԵՄ ֆինանսական և բովանդակային հնարավորություններից»,- նշեց նախարարը»:
Հարցին, թե ի՞նչ ակնկալիքներ կան Ռիգայի գագաթնաժողովից, հաշվի առնելով, որ ԱԳ նախարար Նալբանդյանը հայտարարել է, որ վերջնական տեսքի է բերվում այն փաստաթուղթը, որի հիման վրա պիտի շարունակվեն Հայաստան-ԵՄ հարաբերությունները, Աշոտյանը պատասխանեց. «Իհարկե, Հայաստանի համար ԵՄ-ն ունիկալ գործընկեր է, որովհետև այն տալիս է բազմատեսակ հնարավորություն՝ ֆինանսականից մինչև բովանդակային ու քաղաքական՝ լուծելու Հայաստանի համար արդիական հանդիսացող այս կամ այն հատվածային սեգմենտային խնդիրները: Մեր համագործակցության օրակարգը կարող է լինել շատ բազմաշերտ: Այն պետք է ընդգրկի մարդու իրավունքների և ազատությունների ինստիտուցիոնալ պաշտպանության մեխանիզմների ներդրումից մինչև հնարավոր տնտեսական համագործակցություն: Վստահ եմ, որ Հայաստան-ԵՄ հարաբերությունները պետք է լինեն շատ պրագմատիկ ու ազնիվ: ՀՀ արտաքին քաղաքականությունը միշտ այդպիսին է եղել վերջին տարիների ընթացքում»:
Ինչ վերաբերում է Հայաստանի վրա Ռուսաստանի ազդեցությանը, Աշոտյանը դա բնական է համարում՝ հաշվի առնելով պատմական իրողությունները: «Ակնհայտ է, որ շահերի բախման վրա կառուցված քաղաքականությունը բերում է բավականին դառը հետևանքների: Մենք ունենք Ուկրաինայի օրինակը, երբ աշխարհաքաղաքական շահերի բախումը, որը քաղաքական էլիտայի թողտվության հետևանքով ներխուժում է երկիր, ավերիչ ազդեցություն է ունենում այդ երկրի ու հասարակության համար: Ազնիվ լինենք և շեշտենք, որ ԵՄ ասոցացման համաձայնագիր ստորագրած ոչ մի երկիր դեռ չի լուծել իր առջև կանգնած ոչ մի խնդիր ԵՄ-ի աջակցությամբ»,- ընդգծեց նա:
Ավելին՝ տեսանյութում:
