Yahoo! ինտերնետ-ընկերության համակարգերը օգտատերերին կցուցադրեն Google-ի կոնտեքստային գովազդ: Այս մասին հաղորդում է Yahoo!-ի կորպորատիվ բլոգը:
Հաղորդագրության համաձայն՝ Google-ի կոնտեքստային գովազդը ցուցադրվելու է ամբողջ աշխարհով մեկ սեփական և Yahoo!-ի համատեղ որոշ համակարգերի կայքերում: Ընկերությունը հույս ունի, որ Google-ի հետ համագործակցությունը կոնտեքստային գովազդն ավելի արդյունավետ կդարձնի օգտատերերի համար:
Մրցակցող Yahoo! և Google ընկերություններն ավելի վաղ արդեն կնքել էին համաձայնագիր կոնտեքստային գովազդի կարգավորման վերաբերյալ: 2008թ. ստորագրվել է պայմանագիր, որի համաձայն Google-ը կարող էր ցուցադրել իր գովազդը մրցակցի կայքերում: Այդ ժամանակ խոսքը վերաբերում էր փորձարկմանը, սակայն կողմերը չէին բացառում երկարաժամկետ պայմանագիր կնքելու հավանականությունը:
Նոր պայմանագրի ժամկետների և արժեքի մասին չի հաղորդվում:
