Կիրակի օրը ՀՀ մարզերի 33 համայնքներում տեղական ինքնակառավարման մարմնի ընտրություններ էին: Համայնքներից 26-ում ընտրում էին համայնքի ղեկավար, մնացածում՝ ավագանու անդամներ, իսկ երկուսում՝ ավագանու անդամներ ու համայնքի ղեկավար:
Նշենք, որ Արագածոտնի մարզի Արմավիր համայնքում քաղաքապետի ընտրություններ էին, որտեղ վերընտրվել է ընտրապայքարում միայնակ մնացած համայնքի ղեկավար, ԱԺ ՀՀԿ-ական նախկին պատգամավոր Ռուբեն Հայրապետյանի խնամին՝ Ռուբեն Խլղաթյանը՝ ստանալով ընտրողների 8169 ձայն:
Մնացած համայնքներում հիմնականում վերընտրվել են գործող ՀՀԿ-ական համայնքապետերը: Մասնավորապես, Արագածոտնի մարզի Նալբանդյան համայնքում ընտրվել է գործող ղեկավար, ՀՀԿ-ական Գրիգոր Մկրտչյանը, Հովտամեջում և Հայկավանում ընտրվել են միակ առաջադրված թեկնածուները: Միայն Նոր Արմավիր համայնքում է գործող ՀՀԿ-ական գյուղապետը պարտվել մեկ այլ ՀՀԿ-ական թեկնածուի՝ Արթուր Ավետիսյանին:
Շիրակի մարզի Արփենի համայնքում, որտեղ իրար հետ մրցում էին երկու եղբայր, ընտրվել է գործող համայնքապետի եղբայրը՝ Արսեն Առաքելյանը՝ ստանալով 96 ձայն: Մյուս եղբայրը հավաքել է ընդամենը 35 ձայն:
Կենտրոնական ընտրական հանձնաժողովի նախագահ Տիգրան Մուկուչյանն «Առաջին լրատվական»-ի հետ զրույցում ասաց, որ ընտրություններն անցել են հանգիստ, Ընտրական օրենսգրքին համապատասխան: Միայն առանձին համայնքներից են ընտրության օրը ահազանգեր ստացվել, որոնք Մուկուչյանի խոսքով՝ անհրաժեշտ ձևով ուսումնասիրվել են, ընտրատարածք են մեկնել ԿԸՀ աշխատակիցները, և բոլոր ահազանգերը ուսումնասիրվել են: «Իսկ մնացած մասով միայն ահազանգերի բովանդակությունը հուշում էր՝ խախտումներ եղե՞լ են, թե՞ ոչ»,- ասաց Մուկուչյանը:
Ինչ վերաբերում է դիմում-բողոքներին, ապա ԿԸՀ նախագահի խոսքով՝ ընտրության օրը միայն թիվ 41 ընտրատարածքից է դիմում ստացվել գրանցված թեկնածուի վստահված անձի կողմից, որը վերաբերել է վստահված անձանց համար աշխատատեղ հատկացված չլինելուն: «Նույն պահին աշխատակիցները մեկնել են նշված տարածք, ուսումնասիրել դիմումը, համապատասխան բոլոր միջոցները ձեռք են առնվել»,- ասաց Մուկուչյանը:
Այնուամենայնիվ, Մուկուչյանի խոսքով՝ Ընտրական օրենսգրքի համաձայն՝ դեռ երեկոյան ժամը 18:00-ը ժամանակ կա դիմում-բողոքներ ներկայացնելու համար: