Ճիշտ է, Պարույր Հայրիկյանն արդեն հայտարարել է, որ անհաղթահարելի խոչընդոտներ չի տեսնում ընտրությունները 2 շաբաթով երկարաձգելու համար և չի դիմելու Սահմանադրական դատարան, այնուհանդերձ, օրենքը նրան չի արգելում հետո կատարել այդ քայլը, քանի որ ժամանակային սահմանափակումներ չկան: Թեև սահմանադրագետները պնդում են, որ կարող է նման դիմում ներկայացվել մինչև փետրվարի 11-ը:
«Իսկ հնարավո՞ր է, որ թեկնածուն, ասենք, Պարույր Հայրիկյանը, փորձի ՍԴ դիմել քարոզարշավի վերջին օրը՝ ելնելով օրենքի տված հնարավորությունից» հարցին «Հրապարակի» հետ զրուցող ԿԸՀ նախագահ Տիգրան Մուկուչյանը հիշեցրեց, որ թեկնածուն այդ մասին արդեն հայտարարություն արել է. նրանք գործում են բանականության շրջանակներում, հետո էլ՝ այդ օրը կիրակի է. «Բոլոր դեպքերում, հիշենք, որ վճիռ կայացնող մարմինը Սահմանադրական դատարանն է. վերջինս, դիմումատուի հայցը ստանալով, մանրազնին ուսումնասիրում է ամբողջ գործընթացը, որովհետև ՍԴ որոշումները նպաստում են նախադեպերի կայացմանը, իսկ ոչ ամբողջական մեկնաբանությունը կարող է հետագայում նաև մանիպուլյացիաների առիթ հանդիսանալ»:
Ի դեպ, ոչ միայն ՍԴ դիմելու ժամկետի, այլև թեկնածուի «ինքնախոչընդոտի» դեպքը ևս օրենքում արձանագրված չէ. ասենք, եթե հացադուլ հայտարարած Անդրիաս Ղուկասյանի ինքնազգացողությունը վատանա, և նա չկարողանա շարունակել քարոզարշավը, արդյո՞ք դա ևս «անհաղթահարելի խոչընդոտ» է. պարզվում է՝ այդ դեպքում ևս վերջին խոսքը Սահմանադրական դատարանինն է: