«Հայաստանում Լեհաստանի դեսպան Ռաչինսկու երեկվա հարցազրույցը իսկական փոթորիկ էր առաջացրել հայ քաղաքական դաշտում: Առավոտից սոցիալական ցանցերն էին հեղեղված այդ նյութի քննարկումներով, օրվա երկրորդ կեսին խոսակցությունը տեղափոխվեց խորհրդարան: Անշուշտ, ոչ մի նորություն պարոն դեսպանը չէր բացահայտել, սակայն օտարերկրացու հայացքը, այն էլ՝ դիվանագետի, և հետաքրքիր էր, և սթափեցնող»,- գրում է «Հրապարակը» խմբագրականում և հավելում.
«Կարդալիս մտածում էիր՝ Տեր աստված, ուրեմն այս ամենը ոչ միայն մենք՝ հայերս ենք տեսնում, այլև օտարազգիները, որոնք, թվում է՝ ընդամենը աշխատանքային պարտականություններ են կատարում և բոլորովին պարտավոր չեն խորանալ հայկական մենթալիտետի, մեր ազգային «առանձնահատկությունների» մեջ, ըմբռնել, թե ինչ է նշանակում ընտրություն, ինչպես են աշխատում մեր հատուկ ծառայությունները, ինչ ընտրակեղծիքների մեխանիզմներ են գործում մեզանում, վերջապես՝ ով ով է: Գուցե ճշմարիտ են այս հարցազրույցի մեջ գեոպոլիտիկ շահեր ու բախումներ տեսնողները: Գուցե իսկապես դեսպանը որոշակի «մեսիջներ» է հղել ՀՀ իշխանություններին և քաղաքական ուժերին: Բայց այս դեպքում կարևորը դա էլ չէ, այլ այն, որ մենք մեր վարքուբարքով ստիպել ենք քաղաքակիրթ աշխարհին դիվանագիտական ակնարկների լեզվից հրաժարվել և ուղիղ ու մերկապարանոց ճշմարտություններ հնչեցնել:
Եվ որքան էլ արտաքին գործերի նախարարն ու փոխնախարարը, վարչապետն ու պատգամավորները վրդովվեն՝ մենք ինքներս ենք ստեղծել այդ վիճակը, և չարժե դեսպանին մեղադրել իր լիազորությունների շրջանակը գերազանցելու մեջ: Եթե դու ի վիճակի չես ինքնուրույնաբար կարգուկանոն հաստատել քո տանը, հարևանները ստիպված են միջամտել ու օգնել, հակառակ պարագայում վտանգ կա, որ այդ «անկարգությունը» կտեղափոխվի նաև ընդհանուր օգտագործման տարածք»:
