Ամերիկյան նավթային ընկերություններն անախորժություններ ունեն ոչ միայն նավթի ընդհանուր կտրուկ էժանացման ֆոնին նավթի արտադրության ծավալները չկրճատելու Նավթ արտահանող երկրների կազմակերպության (ՕՊԵԿ) որոշումից հետո, այլև Վաշինգտոնի հնացած վարքագծի պատճառով: Այս մասին գրում է The Financial Times-ը:
Բոլորովին վերջերս ՕՊԵԿ-ի գլխավոր քարտուղար Աբդալլա Ալ-Բադրին «գոհունակությամբ նշեց», որ նավթի էժանացումն արդեն շատ ուժեղ ազդեցություն է ունենում ԱՄՆ-ի օֆշորային ընկերությունների վրա: Կապիտալ ներդրումների և հաստիքների կրճատումը, հորատման կայանենրի փակումը հետևանք են այն բանի, որ ԱՄՆ-ում նավթի վերամշակման ծավալների ավելացումը նավթի համաշխարհային սպառման մակարդակի կտրուկ նվազման ֆոնին առաջարկի ավելցուկ է ստեղծել, հիշեցնում է պարբերականը:
Ամերիկացի նավթագործների խնդիրները խորանում են Վաշինգտոնի ստեղծած սահմանափակումներով: Երկրում մինչև հիմա գործում են արգելքներ, որոնք 1970-ական թթ. մնացուկ են և ընկերություններին խանգարում են անմշակ նավթ վաճառել: Նման արգելքները չեն ազդում սպառողների համար գների նվազելուն, միաժամանակ, դրանց առկայությունը խաթարում է ԱՄՆ-ի հանդեպ միջազգային վստահությունը՝ որպես ազատ առևտրին աջակցող պետության: Ավելին՝ նավթի ցածր գնի շրջանում այդպիսի սահմանափակումները կործանարար են ամերիկյան նավթի արդյունաբերության համար, նշում է The Financial Times-ը:
Ներկայումս ԱՄՆ-ում թուլացած է նավթի արտահանման արգելքը, միջազգային շուկաներում թույլատրված է գերթեթև նավթի վաճառքը, սակայն ընդհանուր առմամբ ածխաջրածինների արտահանման արգելքը պահպանվում է: Միաժամանակ, նույնիսկ WTI ապրանքանիշի նավթի գինը վերջերս ավելի ցածր է, քան Brent ապրանքանիշի նավթի գնից միջինում 9 դոլարով 1 բարելի դիմաց: Ուժեղագույն ֆինանսական ճնշման պայմաններում այդ փողի կորուստն ամերիկյան նավթարդյունաբերության համար մեծ նշանակություն ունի, ասվում է հոդվածում:
«Շարունակելով սահմանափակել արտահանումը՝ ԱՄՆ-ը այդպիսով խաթարում է սեփական արտադրությունը և օգնում է իր մրցակիցներին, ինչպիսիք են Ռուսաստանը և Սաուդյան Արաբիան, մեծացնել բաժինները համաշխարհային շուկաներում: Կանոնները, ի պաշտպանություն որոնց երբեմն ասում են, որ դրանք ապահովում են ԱՄՆ-ի էներգետիկ անվտանգությունը, իրականում միայն կմեծացնեն մաքուր ներկրումը»,- գրում է The Financial Times-ը:
