Մարտի 7-ին Թբիլիսիում՝ Հռոմեական -Կաթոլիկ Սուրբ Եկեղեցու Անդրկովկասյան վարչության Սուրբ Պողոս-Պետրոս մայր տաճարում, Հայ Առաքելական Ուղղափառ Սուրբ Եկեղեցու Վիրահայոց Թեմի հետ համատեղ տեղի է ունեցել Հայոց ցեղասպանության զոհերի հիշատակի երեկո:
Քույր եկեղեցու բակում հավաքված հավատացյալները դիտել են նախամուտքում կազմակերպված՝ Ցեղասպանության մասին պատմող լուսանկարների ցուցադրությունը:
Ինչպես հաղորդում է ՀԱԵ Վիրահայոց թեմի պաշտոնական կայքը, բազմամարդ եկեղեցում հիշատակի երեկոն սկսվել է միասնական Տերունական աղոթքով: Անդրկովկասի հռոմեական կաթոլիկ Եկեղեցու Առաքելական վարչության առաջնորդ Գերաշնորհ Տեր Ջուզեպպե արքեպիսկոպոս Պազոտտոն, ողջունելով ներկաներին, խոսք է ասել օրվա խորհրդի մասին՝ հիշատակելով դարասկզբին հայի ժողովրդի, այնուհետև հրեա ազգի նկատմամբ իրականացված Եղեռնագործությունը, դատապարտել է մարդկության դեմ սանձազերծված ցեղասպանության ամեն տեսակ դրսևորում:
Այնուհետև կատարվել է հոգեհանգստյան կարգ և աղոթք բարձրացվել Օսմանյան Թուրքիայի կողմից Արևմտյան Հայաստանում իրականացված Ցեղասպանության նահատակների հոգիների խաղաղության համար:
Վրաստանի հայ մտավորականների միության նախագահ պատմաբան Ենոք Թադևոսյանը հանդես է եկել Հայոց Եղեռնի մասին ընդարձակ բանախոսությամբ: Իր ստեղծագործություններն է ընթերցել բանաստեղծուհի Մարինա Մոսեսովա-Կիրակոսյանը:
Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանն իր խոսքում կարևորել է այն, որ հայ ժողովուրդը Ցեղասպանության հետևանքով թեև հայրենազրկվեց, բայց ունեցավ նաև իր հերոսամարտերն ու հերոսները, ովքեր պայքարեցին ժողովրդի փրկության համար: Սրբազան Հայրը երախտիքի խոսքեր է ուղղել այն ժողովուրդներին և երկրներին, ովքեր կիսում են հայոց վիշտը, այն պետություններին ու ազգերին ովքեր ընդունել ու ապաստանել են մազապուրծ փրկված հայությանը: Հայ ժողովուրդը պատասխանատվություն է զգում իր անցյալի, ներկայի և ապագայի համար, հայությունը վերածնունդ է ապրում Արցախը ազատագրելով և մայր հայրենիքին վերամիավորելով, վերածնունդ է ապրում Հայաստանում և աշխարհի տարբեր երկրներում իր ձեռքբերումներով: Թեմակալ առաջնորդը շնորհակալություն է հայտնել Անդրկովկասի հռոմեական կաթոլիկ Եկեղեցու առաջնորդին Հայոց ցեղասպանության նահատակների հիշատակի երեկոն կազմակերպելու և հյուրընկալելու համար:
Հիշատակի երեկոյին հնչել են հայերեն, իտալերեն և վրացերեն հոգևոր երգեր հռոմեական -կաթոլիկ և Վիրահայոց թեմի եկեղեցական երգչախմբերի կատարումներով:
Նահատակների հիշատակի ոգեկոչման երեկոներ կանցկացվեն նաև մյուս քույր եկեղեցիներում:
