Գագիկ Ծառուկյանի քաղաքականությունից հեռանալու որոշումը հիասթափեցրել է ոչ միայն նրա հետ իշխանափոխության հույս կապող ուժերին , այլև ԲՀԿ-ական գյուղապետերին,քաղաքապետերին, որոնք անդամագրվել են ԲՀԿ-ին, երբ այն դեռևս իշխանության մաս էր կազմում և ընդդիմություն չէր հռչակվել:
Հայտնի է, որ նրանցից շատերն ընտրվել են ոչ թե որպես ՀՀԿ-ին ընդդիմադիր ուժի ներկայացուցիչ, այլ ուղակի իշխող կուսակցության փոխարեն: Հիմնականում բոլոր համայնքներում, որտեղ այժմ կա ԲՀԿ-ական գյուղապետ՝ նախընտրական շրջանում ստացել են Հանրապետական կուսակցության աջակցությունը և միայն հատուկենտ գյուղերում է, որ երկու ուժերի միջև է պայքար եղել:
Այժմ, երբ Ծառուկյանը քաղաքականությունից հեռանալու, կուսացկության նախագահի պաշտոնը թողնելու վերաբերյալ հայտարարությամբ հանդես եկավ, նրանք արդեն անիմաստ են համարում կուսակցության անդամ լինելն և կշարունակեն զբաղեցնել գյուղապետի պաշտոնն արդեն որպես անկուսակցականներ:
Նրանք, ովքեր մինչև հիմա էլ չեն կողմնորոշվել, առաջիկայում կկատարեն այդ որոշումը և դուրս կգան կուսացկությունից:
Երեկ կուսակցության շարքերը լքելու վերաբերյալ հայտարարությամբ հանդես եկան Սիսիանի, Նոր Հաճնի , Բյուրեղավանի, Գյումրու քաղաքապետերը:
Առաջիկայում նման հայտարարությամբ հանդես կգա նաև Աբովյանի տարածաշրջանի Գառնիի գյուղապետ Աշոտ Վարդանյանը:
«Առաջին լրատվական»-ի հետ զրույցում Արմավիրի տարածաշրջանի Հացիկի գյուղապետ Արթուր Եղիազարյանը ևս չբացառեց կուսակցությունից դուրս գալու հնարավորությունը. «Առայժմ նման որոշում չեմ կայացրել, բայց առաջիկայում հնարավոր է դուրս գամ, Ծառուկյանը չկա, դե էլ արդեն ինչ՝ անիմաստ է», -ասաց նա՝ միևնույն ժամանակ ավելացնելով, որ չի պատրաստվում թողնել գյուղապետի պաշտոնը:
Ի դեպ, այն բոլոր համայնքներում և քաղաքաներում, որտեղ Ծառուկյանի կողմից ֆինանսավորված գեթ մեկ իր կա՝ բոլորը հետ են վերադարձվում: Այն համայնքապետերը, որոնք հրաժարվում են շարունակել իրենց գործունեությունը որպես ԲՀԿ անդամ՝ կառույցներից դուրս են բերում ԲՀԿ դրոշները, պաստառները: Գյումրիում Մանկավարժական ինստիտուտի ռեկտոր Վարդևան Գրիգորյանը ևս լքել է կուսակցության շարքերը, թիվ 33 ընտրատարծքն այլևս ԲՀԿ տարածքային ղեկավար չունի: Մեզ հասած տեղեկություններով՝ կառույցը հնարավոր է ապագայում ընդհանրապես լուծարվի:
Նոր Խարբերդի ԲՀԿ-ական գյուղապետ Կամո Կակոյանը մեզ հետ զրույցում ասաց, որ ինքը քաղաքականությամբ չի հետաքրքվում և մտադրություն էլ չունի ներգրավվել այդ գործընթացներում: «Ես քաղաքական գործիչ չեմ, ինձ չի հետաքրքրում այդ ամենը, ես ընդամենը կուսակցական եմ, ակտիվ գործունեություն չեմ ծավալում և դրա համար էլ դուրս չեմ գա կուսակցությունից, ես որպես այս կուսակցության անդամ եմ ընտրվել գյուղապետ»,- ասաց նա՝ թերևս այս օրերին լինելով միայն ԲՀԿ ներկայացուցիչը, ում չի հետաքրքրում Ծառուկյանի անկումը:
