«ՓՄՁ ներդրումներ» ունիվերսալ վարկային կազմակերպությունը (ՈՒՎԿ) գործունեության մոտ 3.5 տարիների ընթացքում տրամադրել է շուրջ 100 վարկ` ընդհանուր 6.5 մլրդ ՀՀ դրամի չափով: 2012թ. դեկտեմբերի 31-ի դրությամբ վարկային պորտֆելի մնացորդը կազմել է շուրջ 5 մլրդ ՀՀ դրամ, որից 83.2%-ը բաժին է ընկնում արդյունաբերությանը, 10.1%-ը` գյուղատնտեսությանը, իսկ մնացած մասը` այլ ոլորտներին: Այսօր ասուլիսում ՈՒՎԿ գործադիր տնօրեն Արթուր Բադալյանը հայտնեց, որ ՀՀ-ում տարածքային համաչափ զարգացմանը նպաստելու համար նախապատվությունը տրվում է այն ծրագրերին, որոնց նախաձեռնողները գործունեություն են ծավալում ՀՀ մարզերում: Կազմակերպության վարկային պորտֆելի շուրջ 51%-ը տեղաբաշխված է ՀՀ մարզերում:
«ՓՄՁ ներդրումներ» ՈՒՎԿ ընկերության կողմից ֆինանսավորման արդյունքում ոչ միայն պահպանվել են ՓՄՁ սուբյեկտների գործող աշխատատեղերը, այլև դրանց թիվը ավելացել է շուրջ 250-ով, իսկ ֆինանսավորված ծրագրերի ամբողջական իրագործման արդյունքում նախատեսվում է այդ թիվը ավելացնել ևս 200-ով:
Վարկերը տրամադրվում են ՀՀ դրամով, կապիտալ ներդրումների և շրջանառու կապիտալի համալրման նպատակով, մինչև 5 տարի մարման ժամկետով (մինչև 2 տարի վարկի մայր գումարի վճարման արտոնյալ ժամանակահատվածով): Վարկերի տարեկան միջին էֆեկտիվ տոկոսադրույքը կազմում է 11%: