Կոտ դ’Իվուարի ընտրված նախագահ Ալասանա Ուատտարան խոստացել է, որ առաջիկայում կհանի Աբիջանի այն տարածքի շրջափակումը, որտեղ գտնվում է երկրի գործող նախագահ Լորան Գբագբոյի նստավայրը: Այդ մասին հաղորդում է Reuters գործակալությունը` հղում անելով ֆրանսիական հեռուստատեսությանը, որին Ուատտարան հարցազրույց է տվել:
Ուատտարան նաև կոչ է արել ՄԱԿ-ին վերացնել գործող նախագահ Լորան Գբագբոյի գործողությունների հետևանքով երկրի մեծ ընկերությունների նկատմամբ սահամանված պատժամիջոցները: Ըստ Ուատտարայի` սա թույլ կտա սկսել երկրի արագ վերականգնումը: Նա բոլոր բանկերին կոչ է արել բացել բաժանմունքները և սկսել մարդկանց վճարել աշխատավարձերը` միաժամանկ նշելով, որ «հումանիտար աղետը», որն առկա է երկրում, ամբողջությամբ Գբագբոյի մեղքով է:
«Ցավոք, Գբագբոյի ռեժիմը երկիրը հասցրել է հումանիտար աղետի: Մեկ շաբաթ մարդիկ նստել էին տներում` վախենալով իրենց կյանքի համար և ամեն օր ունենալով ջրի, սննդի, էլեկտրականության, դեղորայքի խնդիր: Քաղաքն ապրում է վախի և լարվածության մթնոլորտում, սկսվել է թալանը: Ես խնդրում եմ ԵՄ-ին հանել պատժամիջոցները Աբիջան և Սան-Պեդրո (այս նավահանգիստներով է իրականացվում կակաոյի հիմնական արտահանումը) նավահանգիստների, ինչպես նաև որոշ պետական հիմնարկների վրայից: Ինչ վերաբերում է Գբագբոյին, ապա նա գտնվում է նստավայրում՝ շրջապատված զինված վարձկաններով: Այդ շրջանի անվտանգությունն ապահովելու համար պալատի ողջ երկայնքով կանգնած են զինվորներ»,- ասել է Ուատտարան:
Ենթադրվում է, որ այս քայլով Ուատտարան ընդառաջ է գնում Գբոգբոյի որոշ հայտարարություններին և թույլ է տալիս նրան լքել ինչպես Աբիջանում իր նստավայրը, այնպես էլ երկիրը: