Արևելյան գործընկերների հետ ԵՄ-ի համագործակցությունն ուղղված չէ որևէ մեկի դեմ, ԵՄ համագործակցության դռները բաց են Ռուսաստանի համար, բայց նա պետք է հարգի միջազգային կանոնները: Ria Novosti-ի հաղորդմամբ՝ այս մասին մամլո ասուլիսի ժամանակ հայտարարել է ԵՄ արտաքին քաղաքականության և անվտանգության հարցերով գերագույն հանձնակատար Ֆեդերիկա Մոգերինին:
«Արևելյան երկրների հետ մեր գործընկերությունը ոչ մի կերպ չի կարող առճակատում համարվել: Դա չպետք է որպես պատրվակ օգտագործվի միջազգային սկզբունքների և օրենքների խախտման համար: Ամենասկզբից պարզ էր և հիմա էլ պարզ է, որ եվրոպական համագործակցության դուռը միշտ բաց է, այդ թվում՝ Ռուսաստանի համար»,- ասել է նա:
«Արևելյան գործընկերների և Ռուսաստանի նկատմամբ մեր քաղաքականության վերաբերյալ ես պարզ կասեմ, որ չկա (այնպիսի) եվրոպական քաղաքականություն, որն ուղղված լիներ որևէ մեկի հետ առճակատման: ԵՄ սկզբունքն է ինչպես ներքին, այնպես էլ արտաքին համագործակցությունը»,- ասել է նա:
«Մենք հուսով ենք՝ Ռուսաստանը կվերադառնա պատասխանատու վարքի՝ սկսելով Մինսկի համաձայնության կիրառումից»,- նշել է Մոգերինին:
