Օրեր առաջ Հայաստանի նախագահի թեկնածու Անդրիաս Ղուկասյանը բաց նամակով դիմել էր նախագահի մեկ այլ թեկնածուի՝ Պարույր Հայրիկյանին: Նա կոչ էր արել դիմել Սահմանադրական դատարան՝ նոր ընտրություններ անցկացնելու պահանջով: Անդրիաս Ղուկասյանը հստակեցրել էր, որ այդ դեպքում նա հնարավոր է համարում, հետևելով Հայրիկյանի հորդորին, դուրս գալ հացադուլից և մինչև նոր ընտրությունները ընկած ժամանակահատվածում միասնական պայքար սկսել:
«Առաջին լրատվական»-ի հետ զրույցում ՀՀ նախագահի թեկնածու Անդրիաս Ղուկասյանը մանրամասն ներկայացրեց իր այդ կոչի դրդապատճառները:
– Պարոն Ղուկասյան, թեև Ձեր կոչում փոքր-ինչ պարզաբանել էիք, կխնդրեի մանրամասն մեկնաբանել՝ ի՞նչ կտար նոր ընտրությունների նշանակումը:
– Իմ կարծիքով՝ դա հնարավորություն կտար միավորել հանրության բոլոր առողջ ուժերը՝ նոր ընտրություններում ընտրակաշառք բաժանող կուսակցությունների մասնակցությունն արգելելու նպատակով: Մենք տեսանք, որ պետությունն ի վիճակի չէ մերժել կուսակցությունների մասնակցությունն ընտրություններին: Ըստ երևույթին իշխող կուսակցության վերահսկողության տակ են գտնվում ընտրական համակարգը, ընտրական հանձնաժողովները: Հետևաբար այդ դեպքում հանրությունը ֆիզիկապես կկարողանար արգելել այդ կուսակցություններին առաջադրվել՝ իրականացնելով փողոցային, քաղաքացիական անհնազանդություն, շրջապատելով ԿԸՀ-ն և պարզապես ֆիզիկապես թույլ չտալով մուտք գործել և հանձնել իրենց թեկնածուների փաստաթղթերը: Իմ կարծիքով՝ այսօր նման հնարավորություն կա, և դա կարող էր իրադրությունը արմատապես փոխել:
– Հանրությանը Ձեր ծրագրերը ներկայացրել էիք դեռևս դեկտեմբեր ամսին: Ինչո՞ւ այդ համախմբումը չստացվեց այդ ընթացքում, որ համախմբման համար նոր ընտրությունների նշանակման անհրաժեշտություն եք տեսնում:
– Այդ ժամանակ չէր կարող ստացվել, քանի որ խնդիրը օրակարգ չէր բերված, որ ընտրակաշառք բաժանող կուսակցություններն իրավունք չունեն ընտրություններին մասնակցելու: Մենք ունեցել ենք 9 ընտրություն՝ 5 ԱԺ, 4 նախագահական. երբեք չի վիճարկվել քաղաքական ուժերի՝ ընտրություններին մասնակցելու հակասահմանադրականության հարցը: Սա առաջին դեպքն է, երբ Հայաստանում վիճարկվում է այդ հարցը, և, իհարկե, անհրաժեշտ էր սկզբում այդ հակադրությունը ստեղծել և մատուցել հանրությանը, որպեսզի բացահայտվի՝ այն իրողությունը, որի հետ համակերպվել ենք, իրականում հակասահմանադրական է, հակամարդկային, հակաօրինական և ենթակա է վերացման:
Այսօր հանրությունն արդեն ներքաշված է այս գործընթացում, տեղյակ է, որ նման բան կա, իրազեկված է, բնականաբար՝ պայմանները ստեղծվել են, որ նոր ընտրությունների դեպքում հանրությունը միավորվի, որպեսզի այդ կուսակցություններին թույլ չտա մասնակցելու նախագահական ընտրություններին: Կարևոր հանգամանք այն է, որ պետության դիրքորոշումը երևաց՝ ԿԸՀ-ն իմ դիմումը մերժեց՝ մեկնաբանելով, որ ինքը վարչական մարմին է, ոչ թե պետական, չունի օրենքով մատնանշված որևէ կետ, ըստ որի՝ հանցավոր և Սահմանադրությունը խախտող կուսակցությունները ընտրություններին մասնակցելու իրավունք չունեն: Ուստի այդ խնդիրն անցնում է հանրությանը:
Եթե վարչական մարմինը, ինչպես իրեն համարում է ԿԸՀ-ն, ի վիճակի չէ դա անել, հանրությունը պետք է դա անի:
– Պարոն Ղուկասյան, իր մի շարք հարցազրույցներում Պարույր Հայրիկյանն արդեն նշել է, որ չի դիմի ՀՀ Սահմանադրական դատարան՝ նոր ընտրություններ անցկացնելու պահանջով: Ի՞նչ զարգացումներ եք կանխատեսում այս իրավիճակում: Ձեր կոչում Դուք նշել էիք, որ վտանգված է ոչ միայն Պարույր Հայրիկյանը, այլև ՀՀ նախագահի մյուս թեկնածուները, քանի դեռ հանցագործը բացահայտված չէ. ի՞նչ նկատի ունեիք:
– Ես փաստում եմ իրադրությունը, որ հանցագործությունը բացահայտված չէ. մինչև հանցագործությունը չբացահայտվի, բոլոր թեկնածուները՝ բացի Սերժ Սարգսյանից, կգտնվեն վտանգի մեջ: Դա ակնհայտ գնահատական է, որը պետք է տրվի, և այդ վիճակը պահպանվելու է, քանի դեռ հանցագործությունը բացահայտված չէ, որովհետև ոչ ոք չի կարող ասել՝ սա մե՞կ թեկնածուի դեմ ուղղված գործողություն էր, թե՞ բոլոր թեկնածուներն են վտանգի մեջ: Դա պետք է իրավապահ մարմիններն իրենց քննչական գործողությունների արդյունքում ներկայացնեն, իսկ տեսնում ենք, որ իրավապահ մարմինները լռում են:
Բավական ժամանակ է անցել, բայց ոչ հանցագործի պատկերն են ներկայացնում հանրությանը, ոչ զենքի վերաբերյալ տեղեկություն են տրամադրում, ոչ վարկածներն են ներկայացնում: Այսինքն՝ կա անորոշություն, իսկ դա ի վնաս թեկնածուների է, դրանով պետությունը թեկնածուներին շարունակում է պահել անորոշության և վտանգի մեջ:
– Իսկ հնարավո՞ր եք համարում երկշաբաթյա ժամկետում բացահայտել հանցագործությունը, համախմբել հանրությանը:
– Դրա համար մատնանշեցի Պարույր Հայրիկյանին, որ այստեղ տեսնում եմ իրավական հիմք՝ նոր ընտրություններ պահանջելու դիմումով մտնել ՍԴ, որպեսզի այդ եղանակով իրավիճակը հանգուցալուծվի: Իհարկե, ես գիտեմ Պարույր Հայրիկյանի կարծիքը, հարգում եմ այն, նա փորձառու քաղաքական գործիչ է: Ես ընդամենն իմ կարծիքն իրեն մատուցեցի՝ որպես մեկ այլ տեսակետ, որի որոշումը նա պետք է ընդունի: Վստահ եմ, որ նա կընդունի պատասխանատու որոշում:
– Պարոն Ղուկասյան, փաստորեն, քանի դեռ հանցագործությունը բացահայտված չէ, Դուք և՞ս Ձեզ վտանգված եք զգում:
– Ես գտնում եմ, որ բոլոր թեկնածուները՝ բացի Սերժ Սարգսյանից, վտանգված են, ինչպես նաև ամբողջ հայ ժողովուրդը: