«Լուրջ խոչընդոտներ են ստեղծվել դիտորդական առաքելություն իրականացնող անձանց նկատմամբ: Մենք արդեն հրապարակել ենք, որ մեզ հնարավորություն չընձեռվեց ծանոթանալ թեկնածուների անձնական գործերին: Եվ չկարողացանք ծանոթանալ, թե արդյոք այդ մարդիկ բավարարո՞ւմ են թեկնածու լինելու չափորոշիչներին ընդհանրապես»,- լրագրողների հետ զրույցում ասաց հայտնի փաստաբան Լուսինե Սահակյանը, որը դիտորդական առաքելություն է իրականացնում ՄԻԵԴ-ում ՀՀ դատավորի ընտրության մրցութային փուլի ժամանակ:
Հիշեցնենք, որ փետրվարի 26-27-ը Վճռաբեկ դատարանում տեղի ունեցավ այդ նպատակով արդեն երկրորդ մրցույթի հարցազրույցի փուլը, որին կարող էին հետևել դիտորդական կազմակերպություններն ու լրատվամիջոցները: Նախորդ՝ աշնանային մրցույթի արդյունքները ԵԽԽՎ-ն չէր ընդունել, և Սերժ Սարգսյանը ստիպված էր այն ուժը կորցրած ճանաչել ու նոր մրցույթ հայտարարել: Նախկին մրցույթի հաղթող երեք թեկնածուներն էին ՄԻ նախկին պաշտպան Արմեն Հարությունյանը, միջազգային իրավունքի մասնագետ Արա Ղազարյանը և Գլխավոր դատախազության պաշտոնյա Նելիկ Հարությունյանը: Այս անգամ մրցութային հանձնաժողովը դիտորդական կազմակերպություններին թույլ չտվեց ծանոթանալ առաջադրված 14 թեկնածուների անձնական գործերին ու գրավոր թարգմանություններին, իսկ նախորդ անգամ թույլ էր տվել:
«Հանձնաժողովը մեզ թույլ չտվեց մասնակցել գնահատման փուլին, ինչը խոսում է այն մասին, որ հնարավոր չէ այլևս դիտորդական առաքելություն իրականացնել: Ձևականորեն թափանցիկություն են ապահովել՝ թույլ տալով մասնակցել հարցազրույցի փուլին, բայց մյուս փուլերը փակելով՝ լուրջ խոչընդոտներ են առաջացրել դիտորդական առաքելություն իրականացնելու համար: Հանձնաժողովի անդամներն ի պաշտոնե կոչված են ապահովելու մեր Սահմանադրությունը և սահմանադրորեն երաշխավորված իրավունքները, բայց խախտվում է Սահմանադրության 27-րդ հոդվածը, որովհետև մենք լիարժեքորեն չենք կարողանում իրականացնել մեր՝ հանրային հսկիչի գործառույթը: Խախտվում է Սերժ Սարգսյանի 2014 թ. օգոստոսի 2-ի հրամանագիրը, որով սահմանված է, թե հանձնաժողովն իր գործունեության մեջ պետք է առաջնորդվի ընթացակարգի թափանցիկության և հրապարակայնության սկզբունքով: Եվ հանձնաժողովի անդամները առաջնորդվում են իրենց իսկ ընդունած կարգով»,- ասում է «Իրավունքի Եվրոպա միավորման» անդամ Լուսինե Հակոբյանը:
Այս կազմակերպության մեկ այլ ներկայացուցիչ՝ Տիգրան Եգորյանն էլ ավելացնում է, որ նախորդ մրցույթի համեմատ այս անգամ թափանցիկության և հրապարակայնության շեմն էապես նվազել է: «Եթե ամփոփենք, ապա գնահատման կարգի սահմանված չափանիշների համադրության արդյունքում կստանանք, որ մրցույթի մոտավորապես 50-55 տոկոսը հնարավոր չեղավ դիտարկել: Իսկ այդ մասն իր մեջ ներառում էր լեզվի իմացության ստուգման և ներկայացված փաստաթղթերի դիտարկումը»,- ասում է Տ. Եգորյանը:
«Թափանցիկությունը ԵԽԽՎ-ի համար լուրջ սկզբունք է, և կարելի է արձանագրել, որ տեղի է ունեցել այդ սկզբունքի լուրջ խախտում»,- եզրափակում է Լ. Հակոբյանը:
