Աշխարհի ամենամեծ որբանոցներից մեկը 1915 թվականի Հայոց ցեղասպանության ժամանակ մեկ համալիրում ապաստան է տվել 22 հազար երեխայի։ 100 տարի անց սարսափելի պատմությունները կենդանի են վերապրածների ու նրանց ընտանիքների միջոցով։ Այս ապրիլին լրանում է Հայոց ցեղասպանության 100-րդ տարելիցը։
Դրա կարևորությունը ճանաչելով՝ Բլումֆիլդ Հիլզի (Միչիգան) Maple կինոթատրոնը ցուցադրել է «Ցեղասպանության որբերը» վավերագրական ֆիլմը։
«Ցեղասպանության որբերը» ֆիլմի ռեժիսուրական և պրոդյուսերական աշխատանքներով զբաղվել են «Էմմի» մրցանակի քառակի դափնեկիր Բարեդ Մարոնյանը և նրա թիմը՝ Armenoid Productions-ը։ Այս մասին հայտնում է The Oakland Press-ը։
Մարոնյանը ոգեշնչվել է ստեղծելու այդ ֆիլմը 2010 թվականին՝ The Independent-ում Ռոբերտ Ֆիսկի «Հայոց ցեղասպանության կենդանի ապացույցը» հոդվածը կարդալուց հետո։
Ֆիլմը ստեղծվել է 3.5 տարում և երկու անգամ առաջադրվել «Էմմիի»։ Մարոնյանը խոստովանել է, որ հոդվածը կարդալիս ապշահար է եղել։
Նա ուսումնասիրել է սկանդինավյան, գերմանական և հայկական արխիվները, վիճակագրությունը։ Նա Գերմանիայի ազգային արխիվում հայտնաբերել է հազվագյուտ կադրեր, որոնցում երևում են 22 հազար որբերը։ Նա կարողացել է այդ կադրերը ներառել իր ֆիլմում։
Մարոնյանը մտադիր է նկարահանել նաև «1915-ի կանայք» ֆիլմը։ Նա ցանկանում էր այն թողարկել 100-ամյակին, սակայն դրամահավաքի հետ կապված հարցերի պատճառով թողարկումը տեղի կունենա 2015-ի ընթացքում։