Չինացի նկարիչ Այ Վեյվեյը դարձել է տնտեսական հանցագործությունների գործով կասկածյալ, և նրա հանդեպ քննություն է իրականացվում երկրի օրենքների համաձայն: Այս մասին ապրիլի 7-ին հայտնել է France Presse գործակալությունը` հղում կատարելով Xinhua գործակալությանը:
ՉԺՀ պետական լրատվամիջոցի հաղորդմամբ, նկարչի հանդեպ քննչական աշխատանքներ են սկսվել: Ինչպես նշում է The Daily Telegraph-ը, մեկ ժամվա ընթացքում այդ հայտարարությունը հանվել է Xinhua-ի կայքից:
Ականատեսների վկայությամբ, Այ Վեյվեյը ձերբակալվել է ապրիլի 3-ին Պեկինի օդանավակայանում, որտեղ ցանկացել է նստել Հոնգ Կոնգ թռչող ինքնաթիռը: Հաջորդող 4 օրերի ընթացքում Չինաստանի ամենահայտնի ժամանակակից նկարչի ճակատագրի մասին որևէ տեղեկություն չի հաղորդվել. տեղեկություն չի եղել՝ արդյոք ձերբակալե՞լ են նրան, թե՞ ոչ, և ինչի՞ համար:
Ամբողջ աշխարհում մեծ աղմուկ հանած այս գործն արդեն գրավել է աշխարհի մեծ տերությունների ղեկավարների ուշադրությունը: Նրան ազատելու կոչով են հանդես եկել Գերմանիան, ԱՄՆ-ն, Եվրամիությունը: Չինաստանի պաշտոնյաները հորդորում են չմիջամտել Չինաստանի ներքին գործերին:
Այ Վեյվեյը հայտնի է իր դիսիդենտական կեցվածքով, ավելի վաղ իշխանությունները նրան «ձեռք չեն տվել» Արևմուտքում ունեցած իր համբավի, ինչպես նաև նրա հոր` հայտնի պոետի հանդեպ տածած հարգանքից ելնելով:
Նրա ամենահայտնի գործը Թեյթ թանգարանում իրականացրած ցուցադրությունն է. նկարիչը դահլիճներից մեկը լցրել է ճենապակե արևածաղիկներով: 2011 թ. այդ արևածաղիկների մեկ կիլոգրամը Sotheby’s թանգարանում վաճառվել է 560 հազար դոլարով: Նա նաև մասնակցել է պեկինյան «Թռչնի բույն» մարզադաշտի կառուցմանը, որը հատուկ ստեղծվել էր 2008 թ. օլիմպիադայի համար: Միաժամանակ նկարիչը դեմ է եղել օլիմպիադան իր երկրում անցկացնելու գաղափարին, քանի որ այստեղ ոտնահարվում են մարդու իրավունքները: