«Տեղի ունեցածը դատապարտելի է ու անընդունելի: Նաև ակնհայտ է, որ կատարվածը քաղաքական նպատակներ ունի: Թե ինչու Պարույր Հայրիկյանն ընտրվեց որպես թիրախ, դժվար է ասել»,- ԳԱԼԱ-ի հետ զրույցում ասել է Քաղաքական ուսումնասիրությունների «Վերելք» հիմնադրամի նախագահ, քաղաքական վերլուծաբան Արծրուն Պեպանյանը՝ խոսելով Պարույր Հայրիկյանի դեմ կատարված մահափորձի մասին:
Հիշեցնենք, որ ժամեր առաջ հրազենային վնասվածքով Սուրբ Գրիգոր Լուսավորիչ բժշկական կենտրոն է տեղափոխվել նախագահի թեկնածու, քաղաքական գործիչ Պարույր Հայրիկյանը: Առայժմ ոստիկանությունը պարզում է հանգամանքները:
«Առաջին ռեակցիաս այն է, որ սա Բաղրամյան 26-ին ձեռնտու չէր: Իրադարձությունների հետագա զարգացումները գուցե օգնեն գտնել այն հարցի պատասխանը, թե ում էր սա ձեռնտու: Չեմ գտնում, թե տեղին է շուտափույթ հետևություններ անելը: Մեզ հիմա զգոնություն է հարկավոր, որպեսզի ակամա չանենք այն, ինչ պլանավորել են այս քայլը նախաձեռնողները»,- նշել է Արծրուն Պեպանյանը:
Այն հարցին՝ ինչպե՞ս կանդրադառնա այս միջադեպն առհասարակ նախընտրական շրջանի վրա, քաղաքագետը կարծիք հայտնեց, որ կատարվածն իհարկե լարվածություն կառաջացնի, քանի որ հենց այդ նպատակն էլ հետապնդվել է: Իսկ այն հարցին՝ կարո՞ղ է արդյոք մահափորձը կապ ունենալ Սահմանադրության 52-րդ հոդվածի հետ, թե՞ այն հասարակության ուշադրությունը շեղելու միջոց էր, Արծրուն Պեպանյանը պատասխանել է. «Ամեն ինչ հնարավոր է»:
