Տարածաշրջանային հետազոտությունների կենտրոնի ղեկավար, քաղաքագետ Ռիչարդ Կիրակոսյանն այսօր «Առաջին լրատվական»-ի հետ զրույցում անդրադարձավ ռուսաստանյան մամուլի այն հրապարակումներին, թե Հայաստանում հնարավոր է գունավոր հեղափոխություն իրականացնել: Նրա խոսքերով՝ ռուսական մամուլը պարզապես ապատեղեկատվություն է տարածում:
«Ակնհայտ է, որ գործ ունենք ռուսական մամուլի տարածած ապատեղեկատվության հետ: Ոչ մի գունավոր հեղափոխության հնարավորություն չկա, չկա ներքաղաքական մրցակցություն, այս ամենում արևմուտքի հետ ընդհանուր ոչինչ չկա»:
Մեր այն դիտարկմանը, թե հնարավո՞ր է Հայաստանի ներքաղաքական բախումը հրահրված լիներ Ռուսաստանի կողմից՝ այն իմաստով, որ Սերժ Սարգսյանի սուր ելույթին նախորդել էր ԲՀԿ առաջնորդի Մոսկվա կատարած այցը, Կիրակոսյանն արձագանքեց․
«Ես կասկածամտորեն են վերաբերվում այն տեսակետներին, թե Ռուսաստանն ուղղակիորեն ներգրավված է այս գործընթացներում: Չնայած հնարավոր է, որ այս ներքին բախումը կապ ունի «Բարգավաճ Հայաստանի» ղեկավարի՝ Մոսկվա կատարած այցի հետ:
Ռիչարդ Կիրակոսյանն այնուամենայնիվ չբացառեց, որ Հայաստանում կա ներքին անկայունություն առաջանալու վտանգ․«Ակհայտ է նաև, որ Հայաստանի ներքաղաքական կյանքը հիմա վտանգված է՝ անկայունություն առաջացնելու իմաստով: Ես կարծում եմ, որ յուրաքանչյուր քաղաքական ուժի կամ կուսակցության համար մեծ սխալմունք է փորձել Մոսկվայի աջակցությունը ստանալ: Դրա փոխարեն նրանք իրենց հույսը պետք է դնեն Հայաստանի քաղաքացիների և իրենց ընտրազանգվածի վրա:
