Իրաքյան պատերազմում վերջույթները կորցրած զինվորին նոր ձեռքեր են «կարել» (լուսանկարներ)

Վիրաբույժները հրապարակել են լուսանկարներ, որտեղ Իրաքի պատերազմում պայթյունի հետևանքով բոլոր վերջույթները կորցրած վետերանը վիրահատության արդյունքում «ձեռք է բերել» 2 ձեռք:

Նյու Յորքի 23-ամյա բնակիչ Բրենդան Մարոկոն վիրաբույժների հետ միասին ելույթ է ունեցել մամլո ասուլիսում, որտեղ պատմել է 13 ժամ տևած իր վիրահատության մասին:

Տղամարդը խոստովանել է, որ վիրավորվելուց հետո իրեն լավ էր զգում՝ ոտքերի փոխարեն պրոթեզներ օգտագործելով, սակայն դժվարանում էր առանց ձեռքերի:

Մարոկոն խոստովանել է, որ այժմ ինքն ամենից շատ ուզում է նստել իր սև Dodge մակնիշի ավտոմեքենայի ղեկին, որն արդեն 3 տարի է, ինչ ավտոտնակից դուրս չի եկել:

Բժիշկների խոսքերով՝ Բրենդանի լավատեսությունը նրա արագ ապաքինման գրավականն է:

Բժիշկ Ջեյմի Շորը հայտնել է, որ նա արդեն փորձում է օգտագործել իր ձեռքերը՝ չնայած դեռ չի զգում մատները: Միացյալ Նահանգներում սա ձեռքերի թվով 7-րդ փոխպատվաստումն է:

Վիրահատությունը ղեկավարել է բժիշկ Էնդրյու Լին: Fedpost-ը գրում է, որ չնայած Բրենդանն արդեն դուրս է գրվել հիվանդանոցից՝ նա 2 տարի ինտենսիվ թերապիայի կուրս պետք է անցնի։