Անգոլան, Տոգոն, Ուգանդան և Հարավաֆրիկյան Հանրապետությունը պատրաստ են իրենց մոտ ընդունել Կոտ դ’Իվուարի նախկին նախագահ Լորան Գբագբոյին: Այս մասին հաղորդել է Reuters գործակալությունը` հղում կատարելով իր սեփական աղբյուրներին արևեմտյան մի երկրում և Աֆրիկյան միության` Եթովպիայի մայրաքաղաք Ադիս Աբեբայի կենտրոնական գրասենյակում:
Աֆրիկյան միությունում աղբյուրը նշել է, որ Ուգանդան պատրաստ է ընդունել Լորան Գբագբոյին: Այնտեղ հիշեցրել են, որ Ուգանդայի նախագահ Յովերի Մուսևենին սուր քննադատության է ենթարկել ՄԱԿ-ին` նոյեմբերին կայացած նախագահական ընտրություններից հետո Ալասանա Ուատտարային ճանաչելու համար: Այդ աղբյուրը հավելել է, որ Անգոլան էլ կընդունի Գբագբոյին այն ժամանակ, երբ Կոտ դ’Իվուարում հակամարտող կողմերի միջև համաձայնություն լինի:
Հիշեցնենք, որ վերջին օրերին երկրի տնտեսական մայրաքաղաք Աբիջանում տեղի են ունենում կատաղի բախումներ ընտրված նախագահ Ալասանա Ուատտարայի և նախկին նախագահ Լորան Գբագբոյի կողմնակիցների միջև: Գբագբոն թաքնվում է Աբիջանի իր նստավայրի բունկերում և հրաժարվում է հանձնվել ու նախագահի պաշտոնը զիջել Ալասանա Ուատտարային:
Այսօր հայտնի է դարձել նաև, որ հարձակում է տեղի ունեցել Աբիջանում Ճապոնիայի դեսպանի նստավայրի վրա: Հարձակվողներն, ըստ դեսպանի, եղել են վարձկաններ, որոնք ամբողջությամբ թալանել են շենքը: Հայտնի է, որ Ֆրանսիական խաղաղապահները էվակուացրել են ճապոնական դիվանագիտական անձնակազմը: Այս մասին հաղորդում է BBC-ն: