Յոթնամյա տղայի հարազատները, որին Նյու Յորքի
ոստիկաններն իբրև թե ձեռնաշղթայել էին և 10 ժամ հարցաքննել տեղամասում, փորձում են դատարանի միջոցով ոստիկանական բաժանմունքից և քաղաքի իշխանություններից որպես փոխհատուցում 250 միլիոն դոլար ստանալ: Այս մասին հաղորդում է ABC News հեռուստաալիքը:
Հայցվորների փաստաբանի խոսքերով՝ յոթնամյա երեխաների նկատմամբ չպետք է կիրառել ոստիկանական հատուկ միջոցներ, այդ թվում՝ ձեռնաշղթաներ: Նյու Յորքի ոստիկանական վարչության ղեկավարությունը համաձայն չէ իրավապահ մարմիններին ուղղված մեղադրանքների հետ, սակայն կարգադրել է ներքին հետաքննություն անցկացնել՝ տղայի ձերբակալության հանգամանքները և ոստիկանական տեղամասում նրան պահելու պայմանները պարզելու համար:
2012թ. դեկտեմբերին Բրոնքսի դպրոցներից մեկի յոթնամյա աշակերտ Ուիլսոն Ռեյեսն իբրև թե վիճել էր իր հասակակցի հետ այն բանից հետո, երբ վերջինս նրան մեղադրել է հինգ դոլար գողանալու մեջ: Դպրոց ժամանած ոստիկանությունը տղային տարել էր ոստիկանական տեղամաս հարձակման և կողոպուտի մեղադրանքով:
Տեղի ԶԼՄ-ները հաղորդել էին, որ ոստիկանները ձեռնաշղթաներ են հագցրել տղային և հարցաքննել մոտ 10 ժամ: Ավելի ուշ կողոպուտի մեղադրանքը հանվել է:
Տղայի հետ դաժան վերաբերմունքից ապշած մայրը դատական հայց է ներկայացրել իրավապահ մարմինների դեմ սուտ մեղադրանքների, ֆիզիկական բռնության, բարոյական, հոգեբանական և սահմանադրական իրավունքները խախտելու համար: