Երեկ Լիբիայի ընդդիմությունը հայտարարել է, որ դադարեցրել է նավթարդյունահանումը երկրի արևելքում, քանի որ Մուամար Քադաֆիին հավատարիմ ուժերը սկսել են ռմբակոծել նավթային շրջանները: Այս մասին հաղորդում է Associated Press գործակալությունը:
Հիմնական հարվածը հասցվել է Միսլայի և Ուահա օազիսի նավթային շրջաններին, որտեղից նավթը հասցվում է Թոբրուք քաղաք, իսկ այնտեղից արտահանվում է Քաթար:
Միաժամանակ ՆԱՏՕ-ի օդուժը ռմբակոծության է ենթարկել Լիբիայի ամենախոշոր նավթահանքերից մեկը Սարիրում: Reuters գործակալությունը հաղորդում է, որ ռմբակոծության հետևանքով զոհվել է պահակախմբի երեք անդամ, ինչպես նաև ավերվել է միջերկրական ծովափնյա շրջանները Սարիրի հետ կապող նավթամուղը: Այս մասին հայտնել է Լիբիայի փոխարտգործնախարար Խալեդ Քայիմը: Մեծ Բրիտանիայի օդուժի ներկայացուցիչներն այս տեղեկությունը դեռ չեն մեկնաբանում: Ենթադրվում է, որ հենց բրիտանացիներն են իրականացրել նավթային շրջանների ռմբակոծությունը:
Հնարավոր է, որ սա պատասխան լինի Քադաֆիի ուժերի կողմից ընդդիմության վերահսկողության տակ գտնվող նավթահանքերի վրա նախորդ օրը իրականացված հարձակմանը: