Հայաստանում ստարտափ լինելը հեշտ չէ, միայն գաղափարները քիչ են հաջողության հասնելու համար: Այս հարցում պետությունը պետք է նեցուկ լինի նորարարներին և նրանց աշխատանքի համար բարենպաստ դաշտ ապահովի: Նախորդ կառավարությունն այս ոլորտը համարում էր գերակա, այս նպատակով ստեղծվեց Գյումրու տեխնոպարկը, վերչուրային հիմնադրամներ եկան Հայաստան, ԱԺ-ում ստարտափների հարկային պարտավորությունները մեղմելու համար օրենսդրական կարգավորումներ եղան, ոլորտում մրցակցային դաշտ ստեղծվեց, դրսում կադրեր վերապատրաստվեցին և այլն:
Հովիկ Աբրահամյանը կառավարությունը ոլորտի համար դեռևս տեսանելի քայլեր չի իրականացրել, մինչև այդ եղած հնարավորություններն օգտագործելով՝ ընկերությունները շարունակում են իրենց գործունեությունը՝ մատնանշելով այն ուղղությունները, որտեղ իրենք պետության աջակցության կարիքն ունեն:
Truthly ստարտափի համահիմնադիր և success.am կայքի հիմնադիր Հրաչյա Մանուկյանն «Առաջին լրատվական»-ի հետ զրույցում տեղեկացրեց, որ ոլորտի զարգացման համար վենչուրային հիմնադրամների համար կառավարությունը պետք է բարենպաստ միջավայր ստեղծի, որպեսզի վերջիններս Հայաստանում հնարավորինս մեծ թվով ստարտափների հետ համագործակցեն:
«Հույս ունենք, որ այնպիսի միջավայր կստեղծվի, որ նախագծերը գումարներ հեշտորեն բերեն Հայաստան, դրա համար պետությունը ոչ թե մեր համար պետք է կապեր ստեղծի, մենք դա ինքնուրույն կարող ենք անել, այլ արտոնություններ տա դաշտին»,- նկատեց Մանուկյանը:
Նրա խոսքով՝ անելիքներ կան հիմնականում հարկային դաշտում, շատ նորարարներ խուսափում են իրենց նախագծերը կյանքի կոչել, քանի որ պետք է հաշվապահ ունենալ, հարկեր վճարել. «Եթե գոնե սկսնակ ընկերությունները հարկեր չվճարեին, դա ավելի կաշխուժացներ ոլորտը, ավելի շատ ստարտափներ կունենայինք»:
Մյուս կողմից՝ մեր զրուցակիցը նշեց, որ ստարտափներն այսօր չպետք է մտածեն, թե ինչ կարող է իրենց համար անել պետությունը: Նրանք պետք է լինեն ինքնուրույն, համենայնդեպս՝ մինչև ոտքի կանգնելը:
«Այսօր որոշ ձեռնարկատերեր դժգոհում են, որ իրենց բիզնեսի զարգացման համար Հայաստանում լավ պայմաններ չկան: Միգուցե և այդպես է, բայց բողոքելով հարց չի լուծվում, պետք է այլընտրանքային տարբերակներ գտնել, օրինակ՝ եթե ստարտափին չի բավարարում երկրի օրենսդրական դաշտը կամ հարկային մարմինների հետ գործունեությունը, ի վերջո նա կարող է իր բիզնեսն, ասենք, Կիպրոսում գրանցել: Եթե պետությունը ֆինանսական գործիքներով չի կարողանում լինել նոր բիզնեսի թիկունքում, պետք է գտնել ֆինանսավորում դրսից՝ բիզնես հրեշտակներ կամ ներդրումային ֆոնդեր»,- շեշտեց նա:
Պետության աջակցությունը, ստարտափի մեծ փորձ ունեցող Արտաշես Վարդանյանը այլ կերպ է պատկերացնում, նա կարծում է, որ համալսարաններին կից պետք է գործեն ինկուբատորներ. «Որոշ ռեսուրսներ պետությունը պետք է հասանելի դարձնի ստարտափներին, ինչու չէ՝ նաև գումարներ ներդնելով, տարբեր թիմեր պետք է ժամանակ առ ժամանակ արտասահման գնան»:
Վարդանյանի մեթոդով կարևոր է նաև համապատասխան կրթությունը սկսել դպրոցներից. «Ծրագրավորման առարկան պետք է սկսել դեռ 4-րդ դասարանից»:
Մեր զրուցակիցները մատնանշեցին հիմնական խնդիրները՝ հույս ունենալով, որ նոր կառավարությունն այս ուղղությամբ քայլեր կիրականացնի:
