Ռուսաստանի արտաքին քաղաքականության հիմնական ուղղությունն ու առաջնահերթությունը ԱՊՀ տարածքն է: ITAR-TASS-ի փոխանցմամբ՝ այս մասին հայտարարել է ՌԴ ԱԳՆ ղեկավար Սերգեյ Լավրովը:
«Համագործակցության տարածքում բազմակողմ փոխգործակցության ամրապնդումը ու ինտեգրման գործընթացների ընդլայնումը կուրս է, որը հաշվարկված է ռազմավարական հեռանկարի համար ու արտացոլում է գլոբալացման դարաշրջանի օբյեկտիվ միտումները՝ ներառյալ տարածաշրջանային միավորումների դերի ամրապնդումը»,- ասվում է ՌԴ ԱԳՆ-ի կայքում տեղակայված Լավրովի հոդվածում:
ՌԴ արտգործնախարարը նկատել է, որ նախագահ Վլադիմիր Պուտինը «բազմիցս ընդգծել է ԱՊՀ երկրների հետ հարաբերությունների հետ տարվող աշխատանքը ամրապնդելու անհրաժեշտությունը՝ ներառյալ մեր ամենամոտ ինտեգրացիոն գործընկերներին՝ Միութենական պետության մասնակիցներին ու «եռյակին»՝ Ռուսաստան, Բելառուս ու Ղազախստան, որոնք ձևավորել են Մաքսային միությունն ու ձեռնամուխ են եղել Միասնական տնտեսական տիրույթի ձևաչափով աշխատանքներին»:
Նա հիշեցրել է, որ 2012-ին ուժի մեջ է մտել Ազատ առևտրի գոտու մասին պայմանագիրը, որը կոչված է արդիականացնել ԱՊՀ երկրների առևտրատնտեսական համագործակցության նորմատիվաիրավական բազան, ստորագրվել է համագործակցության համաձայնագիր ԱՊՀ անդամ-պետությունների ինտեգրված արժույթի շուկայի կազմակերպման մասին:
ՌԴ արտգործնախարարը վստահ է, որ Եվրասիական տնտեսական միությունը «կոչված է դառնալ խոշորագույն աշխարհաքաղաքական նախագիծ ու նոր պատմական անկյունաքար ոչ միայն «եռյակի» պետությունների, այլև ԱՊՀ մյուս պետությունների համար: